Manderangni namgnina ma·mongni scheme-rangko nambate chu·sokatchina didianga

TURA: Rural Development aro dingtang dingtang Ministry-ni ning·o ma·mong sorkarini ra·gatgipa scheme-rangko nipilna gita Bristibar salo, Tura-ni MP Saleng A Sangma, District Development Coordination and Monitoring Committee (DISHA)-ni tom·aniko, Tura-ni DRDA Conference Hall-o ong·atangaha aro ia tom·anio dingtang dingtang department-ni officer-rang bak ra·angtokaha.
Ia tom·aniko ong·atani bidingo, dingtang dingtang department officer-rangna talate on·angengon, ma·mong sorkarini ra·gatgipa scheme-rangko manderangona sokate on·na miksonganio ia scheme-ni kamrangko somoi gita nipilrongna nanga ine Sangma talataniko on·angenba, manderangni namgnina aro jolo namroro silroroaniko ra·bana gita ia scheme-rangko nambate chu·sokatchina dingtang dingtang department-rangko didiangaha.
Ma·mong sorkarini scheme-rangko chu·sokatanio chagrongna nangenggipa neng·nikanirangko talate on·china didiangengon, kamrangko nambate chu·sokgipa ong·atna pilak gadangrangon ku·mong nangrimani gnang kamko ka·china Tura MP, dingtang dingtang department-rangko didiangaha.
Ia tom·anio dingtang dingtang department-rang, an·tangtangni chu·sokatenggipa scheme aro project-rangko Tura MP-na talate on·angtokaha.
Ia tom·anio dingtang dingtang scheme aro program-rang, jekai MGNREGS, PMAY, National Social Assistance Scheme, DRDA-ni ning·o ra·gatgipa NRLM, Development Branch-ni MPLADS, Swachh Bharat Mission, DDU-GKY, Supply Department-ni Food Security Act, DCIC-ni PMEGP, Agriculture Department-ni RKVY aro PMKSY, ICDS, Health & Family Welfare-ni National Health Mission, Sarva Shiksha Abhiyan, Midday Meal scheme, PWD-ni PMGSY aro Highways, Soil & Water Conservation Department-ni PMKSY, District Water Resources aro uandakgipa department-rangni dingtang dingtang scheme-rangko Tura MP niangaha.
Ia tom·anio West Garo Hills a·jani Deputy Commissioner Jagdish Chelani, Dadenggre Civil Sub-Division-ni SDO Sumeet Singh, District Planning Officer Nipon Hajong, ADC-rang, gitcham MLA FCA Sangma aro gipinrangba dongpae bak ra·angaha.