TURA: Mijal Sukrobar pringni bako, Bangladesh a·songoni niam gri re·napbagipa sakchet manderangko, West Garo Hills a·jani police-rang, Hallidayganj-o rim·na man·aha.
Ia manderangoniko police-rang, chipu manggnikoba man·aha.
Police-rangni u·iatani gitade, ia manderang, Bangladesh a·songoni Dalu gita India a·songona re·napbaaha aro ia manderangara, Bangladesh a·songni Mitapukur aro Sabar, Habra-oni ong·achim.
Rim·ako man·gipa manderangoni sakgnide me·chikrang ong·achim aro rim·ako man·gipa manderangara, bilsi 27 ong·gipa Pappu Sheikh, bilsi 39 ong·gipa Alif Mal, bilsi 18 ong·gipa Masirul Ojha, bilsi 37 ong·gipa Arif Sheikh, bilsi 19 ong·gipa Maherul Khan, bilsi 35 ong·gipa Alif Mondol, Dalia Ojha aro Jhorina ong·a.
Ia manderangni kosako police-rang, Foreigners Act aro Passport Act-ni ning·o mokordomako ka·aha aro chipurangko Wildlife official-rangna pakwate on·ataha.
Ia chipu manggniko police-rang, Papu Sheikh aro Alif Mondol minggipa mande sakgnioniko man·aha.
