TURA: National Highway (NH-127B) ramako tarianio je manderangan, an·tangtangni gamchatbegipa a·arangko sorkarina on·na nangahachim, iandakgipa a·a nokgiparangna, uamangni a·ani kri tangka paisarangko gamchina Selsella-o dingtang dingtang dolrangni nangrime bikotgipa All Selsella NGO’s Alliance, a·dok sorkariko didiataha.
Iani bidingo, West Garo Hills a·jani Deputy Commissioner-na sedoatengon, NH-127B ramako tarianio, rama sambarango donggipa manderang, an·tangtangni gamna ge·na jakkalenggipa a·arangko, bite gnanggipa bolrangko aro dokkanrangko gimaatna nangaha ine All Selsella NGOs Alliance (ASNA) parakatenba, ia a·a nokgiparangna Right to Fair Compensation and Transparency in Land Acquisition, Rehabilitation and Resettlement Act 2013 (RFCTLARR Act 2013)-o pangchake compensation ba tangka paisarangko gamchina didiataha.
NGO-rangni parakatani gitade, ia Act ba niamni ning·o a·arangko ra·anina, bol wa·a, gama ge·ani aro ma·manti gam-jinrangnaba tangka paisarangko gamna nangachim.
Ia niamni bidingo janapatengon, bite nanggipa bol pangpraknan gong 50,000-oni lak 1-ona aro bite nanggijagipa bol pangprakna gong 10,000-oni gong 50,000-ni gisepo gamchina All Selsella NGOs Alliance, a·dok sorkariko didiataha.
A·arangko on·anio square feet 100-na komigipa dokkanrangna gong lak 2-oni lak 5 aro square feet 500-na bate dal·gipa dokkanrangnade gong lak 50-ona kingking gamchina gitaba All Selsella NGOs Alliance, a·dok sorkariko didiataha.
Ia All Selsella NGO’s Alliance-ni ning·o donggipa dolrangara, GSU, FKJGP, GSMC, ASWA, ADE, ANYO, ACHIK, NGCO aro gipinrang ong·a.