Dadenggre-ko district songchina dabie CM-na memo on·a

TURA: Dadenggre Civil Sub-Division-ko chu·gimik district-ni gadangona ra·doatchina dabienba All People Movement for Dadenggre District (APMDD) aro dingtang dingtang NGO aro Nokma dilgiparang nangrimenba, a·dokni Chief Minister Conrad K Sangma-na memorandum-ko on·angaha.
Chief Minister-na sedoatgipa chittio APMDD-ni parakatani gitade, Dadenggre Civil Sub-Division-ko 1982 bilsion bikotahani gimin ian a·doko gitchambatsranggipa Civil Sub-Division-rangoni damsa ong·enga aro ia sub-division-ko district songchina gita Dadenggre-o songdongenggipa manderang, 1999 bilsimangonin dabina a·bachengahachim.
“Dadenggre Civil Sub-Division-ko 1982 bilsion bikotaha aro ia sub-division-ko district-ona ra·doatchina 1999 bilsimangonin dabina a·bachengahani gimin Dadenggre-ko district songchina dabiani da·o bilsi 26 ong·engaha,” ine APMDD-ni dilgiparang janapatenba, Dadenggre Civil Sub-Division-ko district songe on·china Chief Minister Conrad Sangma-ko mol·molataha.
Dadenggre sub-division-ko gital district songgenchimode ian chadamberangna kamrangko nakatate on·na chol ong·genchim aro diltugipa songrango donggipa manderangni neng·nikanirangkoba chel·atna dakchakani ong·gnokchim ine janapatengon, ru·uta bilsirangoni manderangni dabienggipa gital district-ko ta·raken be·en pil·atchina gita APMDD-ni dilgiparang, a·dokni Chief Minister-ko didiataha.