TURA: Mongolbar salo, West Garo Hills District Tuberculosis (TB) Centre-ni gita 100 Days TB Campaign-ko Selsella Community Health Centre (CHC)-o ong·atangaha aro ia program-ko ong·atanio, Selsella constituency-ni MLA Arbinstone Marak, mongsonggipa sokgipa ong·e bak ra·angaha.
Ia 100 Days Campaign-ko ong·atanio Selsella MLA, jinmana aganprakangengon, ia program-o dongpae bak ra·na man·ahani gimin an·tangni kusi ong·aniko parakangenba, ia namgipa cholko ra·china songni nokni manderangko didiangaha.
TB sagipa manderang, namgipa cha·ani ringanirangko cha·na ringna nanga aro nokdangonikosan ong·aigija songsalni bakrimanikoba nanga ine janapatengon, ia program-o bak ra·e ia 100 Days TB Elimination Camp-ko chu·sokgipa ong·atchina songni dilgiparangko, VHC membor-rangko aro songni nokni manderangko Marak didiangaha.
TB sagipa mande, an·tangko porikka ra·e nina re·baja ong·ode ia sabisiko an·tangni nokdangosan ong·aigija songsalni pilak manderangon batrikrikatna man·a ine janapatengon, TB saani chin donggipa pilak manderangkon ia camp-ona re·bae, an·tangtangko porikka ra·e nichina aro TB saaniko bon·atanio sorkari baksa bakrimchina Marak didiangaha.
Ia program-ko ong·atanio, West Garo Hills a·jani District TB Officer Dr Riksilchi Sangma-ba jinmana aganprakengon, TB saani bidingo agan-talatanirangko on·angenba, a·songo TB saaniko bon·atna gita miksonganiosa sorkari, ia 100 Days TB Elimination Camp-ko ong·atenga ine parakataha.