TURA: Songona JJM scheme-ko sokatangjani gimin West Garo Hills-ni Bhangarpur songni headman, PHE Minister-na badi ka·aha.
Ia JJM scheme-ara, skang 2021-22 bislio Greater Tikrikilla Water Supply Scheme-ni ning·o chamgimin ong·achim.
“Ia scheme-ni ning·o gimik gimang ge 558 nokdangrangna chirangko sale on·na gita Gong 10,94640/- tangka-paisarangko chamahachim. Iarangni bidingo department-o see rakkiani gitade, ia songo chirangko sale on·na gita Gong 8,21530/- tangkarangko jakkalaha aroba ge 90 nokdangrangna chi pipe-rangkoba sale on·aha ineba record-o mesokahachim. Indake ong·genchimode chong·motko sandiode uamangni a·kangani gitade pipe-rangba dongja aro tap-rangba dongja” ineba songni Headman Mottior Hussain, PHE Minister-na badi ka·gipa chittio janapaha.
Hussain indakeba agandapkua je, skang chamatgipana agreba uamangni a·kange aganani gitade, songo-noko chi pipe-rangko tikatna man·kugijagiparangna matchote sale on·na gita 2022-23 bilsioba gital scheme ‘Extension of Distribution System for left out households under Tikrikilla block’-ni bimango ia Gong 1,21002/- tangkarangko ia JJM scheme-na chamattaiaha. Indake ong·engon, department-ni reord-o gitade uanonikoba adita tangka-paisarangkode jakkalachim indiba songo chi sale on·ani chinkode mamingkoba nikkuja ine Hussain agandapaha.
Indake ong·engon, namedake sandianirangko dakenba dosi donggipani kosako bichal ka·chinaba aroba song-nokna chi pipe-rangko sokate on·china gita Hussain, PHE Minister-na badi ka·gipa chittio mol·molaha.
