SHILLONG: Shillong songjinmani dingtang dingtang ramarango apchangket ong·anichi neng·nikanirangko chagrongna nangtokengani gimin Defence Ministry-ni ning·o ga·akgipa biaprangko, dingtang dingtang biaprangona rama tarie jakkalna man·na gita Budbar salo, BJP-ni MLA Sanbor Shullai, BJP-ni state president Rikman G Momin, BJP-ni state vice president Bernard N Marak aro BJP-ni gipin dilgiparang, Union Defence Minister Rajnath Singh-ko New Delhi-o grongenba agangrikeaha.
Union Defence Minister-ko grongani ja·man kobor ra·timgiparangna u·iatengon, Lady Keane Road-oni Police Bazar-ona dakanggipa rama, Shillong Peak Road, Umpling Bridge Road-oni Shillong Chief Engineer Office aro Anjali Cinema Hall sambao donggipa footpath gimikan Defence Ministry-ni ning·o ga·akgipa biaprang ong·a aro ia ramarangko ramram manderangna, simarangko aro fencing-rangko kae gari gora salrurana on·genchimode, Shillong songjinmani mongsonggipa ramarango traffic jam ong·aniko komiatna man·genchim ine BJP MLA Sanbor Shullai parakataha.
“Umsohsun-oni Rhino junction-ona dakanggipa Defence Ministry-ni a·arangko parking lot dake jakkalna man·genchimode Khyndailad jolrango traffic jam ong·aniko komiatna man·gen,” ineba ua aganaha.
Anjali Cantonment Beat House sambao donggipa Defence-ni a·arangko gari park ka·na aro bostu paldinggiparangna on·na man·genchimode traffic jam ong·aniko bewalan komiatna man·gen ineba ua aganaha.
“Defence Ministry-ni a·arangna dongimin niamrango pangchake, tangka paisarangko gamenba ia a·arangko ra·na man·gen,” ine Shullai, ku·pattianiko on·angaha.
“Chingni mol·molanirangko niatna Union Defence Minister ku·rachakataha aro iako chu·sokatna chinga a·dokni BJP, rakbee kamko ka·angkugen,” ineba BJP MLA aganaha.
Indake ong·engon, Rhino Point sambao donggipa a·arangko Defence official-rangni fencing kaani giminba a·dokni BJP dilgiparang, Union Minister baksa agangrikangaha aro iani bidingo ua niatna gita ku·rachakaniko on·ataha ineba Shullai parakataha.
Iani bidingo BJP-ni dilgiparang bakan a·dokni Chief Minister-ko gronge, Shillong songjinmao donggipa Defence-ni a·arangko ra·na gita dingtangmancha state level committee-ko songchina mol·molegen ineba BJP MLA parakataha.