SHILLONG: BJP-chi dilenggipa NDA sorkari, India a·songni pilak biaprangon Uniform Civil Code (UCC)-ko ra·gatna miksongengon, Meghalaya a·dokode UCC-ko NPP-chi dilenggipa MDA sorkari ra·gatjana manchiskaaha.
BJP-chi dilenggipa National Democratic Alliance (NDA)-o National People’s Party (NPP)-ba ong·engachim ine nikna man·a.
Iani bidingo talataniko on·angengon, UCC-de NPP-chi dilenggipa MDA-ni chu·sokatna nangnikgipa kam ong·jani gimin ia niamko a·dok sorkari maming dakeba ra·chakjawa ine a·dokni Chief Minister Conrad K Sangma parakataha.
“Meghalaya a·doko aro a·song gimikon dingtang dingtang jat aro toromni daka rikanirangko chinga mande ra·a aro dingtang dingtang jatrangni daka rikani ba bebera·aniko mande ra·na nanga,” ine Chief Minister aganaha.
UCC-ko jegalna gita manchiani bidingo talatangengon, India a·songo ritchani ritcha tribal jatrang dongani gimin pilak jat aro toromrangon daka rikani aro bebera·ani apsan ong·na man·ja ine Sangma aganaha. UCC gita dakgipa niamara dingtang dingtang jatrangni daka rikani aro bebera·ani baksa apsan ong·na man·jawa ineba ua aganaha.
Tribal jatrangni bilrangko chel·chake mitam niamrangkode apsan ong·atna man·naba gnang ine janapatengon, “Jat ge·antion apsan janggi tangani bewalko ja·rikataniara niamo ong·jaenga aro kraaniba ong·ja,” ine Chief Minister aganaha.
Uttarakhand a·doko tribal-rangni ja·rikgipa niamrangko wate India a·songo UCC-ko ra·gatchenggipa a·dok ong·ahani gimin janapatskaengon, “A·songni ba a·dokni gadango matrilineal system-ko ja·rikchina bill-ko ra·gatgenchim ong·ode Meghalaya a·dokba matrilineal ba me·chikrangchiko ra·gipa a·dok ong·ani gimin ia niamko ra·chakna man·aigenchim,” ine Sangma aganaha.
UCC-ara, a·songo songdongenggipa pilak manderangnan, bia ka·ani, jik-se galgrikani, deragatani, gam-jin man·rikani aro bil man·rikanio apsan niamko ja·rikna gita ma·mong sorkarini ra·baenggipa Bill ong·a ine nikna man·a.