SGH-ni koelarangko niam gri Assam-ona salangenga ine badi ka·a

NONGALBIBRA: South Garo Hills a·jani koela depot damsaoniko niam gri Assam a·dokni Dudhnoi-Krishnai jolrangona salangenga ine South Garo Hills a·jao donggipa Era A·ning a·king Nokmani chawari Rajen Ch Sangma, South Garo Hills a·jani Deputy Commissioner-na badi ka·doangaha.
Deputy Commissioner-na badi ka·e sedoatgipa chittio Sangma-ni parakatani gitade, South Garo Hills a·jani Pathargittimo donggipa koela depot-o dakkie galgimin metric ton 57,000 koelarangko salna gitasa sorkari ge·etaniko on·ahachim indiba koelarangko dakkiani ja·man, West Khasi Hills aro South Garo Hills a·jaoniko bikotdaldalgipa koelarangkoba Jadigittimo chimonge donenga ine nikna man·ahachim.
Ia bikotdaldalgipa koelarangko M/S Simsang Mining Private Limited minggipa company, nangchakegipa official-rangni permission gri, bol 1000-na baten truck garirango Assam a·dokni Dudhnoi ba Krishnai-ona salangaha ineba Sangma matnangataha.
“Sorkari aro district administration-ni permission gri, tik ka·gijagipa koela depot-oniko Assam-ona salanganiara niamni a·palo ong·a aro iako chinga raken jegalenga,” ine Era A·ning a·king Nokmani chawari parakataha.
Iani bidingo ta·raken sandirokanirangko dakchina aro niam gri koela salgipa company-ni kosako rakgipa ja·kurangko de·china gitaba Sangma, South Garo Hills-ni Deputy Commissioner-ko didiataha.