SHILLONG: Aggregate Technical & Commercial (AT&C)-o noksan ong·aniko 12 percent-ona komiatna gita Meghalaya Energy Corporation Limited (MeECL), dingtangmancha nisanko donenga.
Batanggimin bilsirangonin AT&C-o bang·en noksan ong·na nangengani a·sel MeECL, tangka paisani gita neng·nikanirangko chagrongna nangenga aro a·dok sorkarioni u·iatani gitade da·o dipet MeECL, AT&C-o 18 percent-mangni gita noksan ong·na nangkuenga.
Sorkari official-rangni u·iatani gitade, bilsigittam ba bilsibrimangna skangsan MeECL, AT&C-o 35 percent-ni gita noksan ong·na nangengachim indiba dingtang dingtang cholrangko ra·gatanichi da·o MeECL-ni noksan ong·aniko bewalan komiatna man·aha.
AT&C-o noksan ong·aniko maikai 12 percent-ona komiatna miksongenga ine sing·anina aganchakaniko on·angengon, da·o MeECL-ni official-rang, sub-divisional-ni gadango kamrangko ka·skana miksongenga ine official-rang parakataha. Bijoli cha·aniko name ma·sina gita transformer-rango meter-rangko dona a·bachengataha aro bijoli cha·ue ra·aniko champengnaba kamrangko a·bachengataha ine official-rang aganaha.
Indake ong·engon, Umiam Lake-ko nitobatatanio adita a·arangko Tourism department-na on·na gitaba Power department, kamrangko ka·soengaha ine koborko on·aha. Ia a·arangko Tourism department-na pakwatna gita survey-rangko ka·enga ineba official-rang parakataha.
Umiam Lake-ni adita bakrangko MeECL man·ani gimin ia a·arangoni mitamko Tourism department, ia chibolko taridapanio ra·dapna gita nangnikahachim.
“Ia a·arangko man·a dipet ta·raken on·china Tourism department nangnikengani gimin chingaba a·arangko pakwatna gita kamrangko ta·raken ka·engaha,” ine Power department-oni kobor on·timgiparang aganaha.