SHILLONG: Meghalaya High Court-ni seokgipa, kamoni neng·takgipa Justice BP Katakey-ni dilenggipa committee, South Garo Hills-o niamgri koela bikote salrurani bidingo badi ka·gipa mingsni mamlarangko sandienga.
Sonibar salo The Shillong Times-ni kobor ra·timgiparang baksa agangrikmitingo Justice Katakey, indine aganaha, ‘South Garo Hills-o niamgri koela bikotaniko am·sandiaon adita sakkirangko man·aha. Uni nirokgipa report-ko Meghalaya High Court-na on·gipa interim report-o on·chapaha.
Badi ka·gipa gimik mingsni mamlarangkon sandienga. Ia mamlako bak donggipa gimiknan notice-ko on·aha. Indiba saksa committee-na mikkang paana sokbajaha. Uamangni nangnika ba namnika gitan hearing-ko Guwahati-o ong·atahachim. Mingdok badi ka·gipa mamlarango a·dok sorkarioniko report-ko bi·ataha. Sorkari mamlako am·sandina official-ko seokaha ine Justice Katakey aganaha.
Indake ong·engon committee, mamlako am·sandiengon maming donnue gri tale sandiachina aganaha. Badi ka·gipani neng·nikarangkoba knachake apsangipa cholko on·na nanga.
Uandaek Bangladesh-on niamgri bol 100-150 trak gario koelarangko watatenga ine video gita badi ka·gipani gimin janapatengon Katakey indine aganaha, “iani bidingo Superintendent of Police (SP) aro Deputy Commissioner (DC)-ko nirokatchina ge·etaha ine aganaha.
“Ia matnanganiko kakket ong·nikjaenga, maina indita bol trak garirangko koela salangako maidake Customs authorities nikgija dakna man·gen, iako ong·nikja ine Katakey aganaha.
Committee, MDC election matchota ja·man Shillong-ona re·bagen, uno a·doko niamgri koela bikotani bidingo report-rangko nigen.
Meghalaya-o niamgri koela bikotania mamla pangnan nakatronga. Activist aro jolni manderang ia mamlao badi ka·ronga.
