TURA: South Garo Hills a·jani Chokpot Silki primary health centre (PHC)-ni ning·o donggipa Rongchong sub-centre-ko rika matchotaoni bilsi 17-na jakkalgija galchipe donengani a·sel da·o ia sub-centre-ni obosta namsrangjaengaha ine A·chik Dedicated Integrity Leaders (ADIL) Gasuapara regional unit parakatenba, jolo songdongenggipa manderangni namgnina ia sub-centre-ko taripilenba chalaichina a·dok sorkariko didiataha.
ADIL Gasuapara regional unit-ni president S Salgra G Momin-ni parakatani gitade, ia Rongchong songara, Gasuapara main road-oni kilometer 18 chel·ao donggipa biap ong·a aro ia Rongchong sub-centre-ko 2008 bilsion rika matchotahaoba jakkalgija galchipe donahani a·selan ia jolo songdongenggipa manderang, chel·a biaprangonasa re·e sanna bananirangko ra·na nangtokengachim.
“Ia gital sub-centre-ko jakkalgija galchipahani a·selan Rongchong sub-centre-o kam ka·enggiparang da·o nosto ong·gimin VEC hall-osa kamrangko ka·chakna nangenga aro ia hall-o samrangko dona, palangrangko dona aro kam ka·enggiparangnaba dongchakanirangan dongjae neng·nikanirangko chagrongna nangtokenga. Ia sub-centre-o kam ka·enggipa manderang iandake neng·nikanirangko chagrongna nangengani a·selan songo noko donggipa manderangna sanna bananirangko on·anio neng·nikanirangko man·tokna nangenga,” ine ADIL Gasuapara regional unit-ni president parakataha.
Iani bidingo songni manderang changni chang, uamangni dilgiparangna u·iatahaoba maming dakchakanirangko man·jaha ineba u·iataha.
“Songni manderang chingna u·iatani ja·mansa chinga ia songni sub-centre-ko nina re·angaha aro ia biapko nieon, ia sub-centre-ni obostako nike namen suk ong·jaha,” ine ADIL Gasuapara regional unit-ni president parakatenba, ia sub-centre-ko ta·raken taripiltaienba, chalaichina a·dokni Chief Minister, Health Minister, South Garo Hills a·jani Deputy Commissioner aro medical officer-rangko didiataha.