Namroro silroroaniko nikna man·engahani gimin bobil dolrangko bikottaiani chol dongja ine a·kanga
SHILLONG: Garo Hills-o bobil dake chakatgipa Garo National Liberation Council (GNLA) aro gipin dolrangko bikottaina jotton ka·enga ine social media-rango jangbingbanganiko Bristibar salo, a·dokni Cabinet Minister aro Williamnagar MLA Marcuise N Marak jegalatenba, ia sal somoirango a·dokni pilak biaprangon namroro silroroaniko nikna man·engahani gimin bobil dake chakatgipa dolrangko bikottaiani chol dongjaha ine a·kangataha.
Marak-ni parakatani gitade, a·dok sorkarini kamrangchi aro chadamberangna dingtang dingtang janggi tangani cholrangko on·anichi chadamberangko ong·gija ramarango dilsretaoniko champengna man·engaha.
Batanggimin somoirango Garo Hills-o bobil dake chakatgipa dolrangni bilake kam ka·anirangko gisik ra·atpilengon, skangode Williamnagar jolrangoba bobil dake chakatgipa dolrang bilakani gimin bang·a chadamberangan ong·gija ramarango dilsretako man·rongachim indiba ia chasongni chadamberang namen skie man·bata aro sorkarini on·enggipa dingtang dingtang cholrangchi janggi tangani cholrangko man·engahani gimin ong·gija ramarango dilsretako man·tokjaha ine Williamnagar MLA aganaha.
“Da·alo chadamberangoni bang·batan skia pora donggiparangsa ong·a aro sorkarini gitaba chinga chadamberangna CM Elevate, Meghalaya State Rural Livelihood Society (MSRLS) programrang, FOCUS, FOCUS plus aro dingtang dingtang program-rangko ra·gate on·aha. District administration aro block development officer-rang baksaba chinga dingtang dingtang awareness program-rangko ong·ataha. Da·alo chadamberang police-ni kamrangna krenge jotton ka·enga aro pringantian be·enni gita ranta ka·anirangkoba dakenga,” ine a·dokni Cabinet Minister aganaha.
Chadamberangna dingtang dingtang porikkarangko sena gita training-rangko on·enga ine janapatengon, “Ia chadamberangna MCS aro MPS officer-rangba dakchakanirangko on·na kusi ong·enga aro uamang chu·sokgiparang ong·china chinga krenge kamrangko ka·enga,” ine Marak aganaha.
GNLA bobil dolni gitcham membor-rangna dakchakanirangko on·ani bidingo janapatskaengon, sorkarini dakchakanichi ia manderangoni bang·batan da·o namgipa kamrangko ka·e songsalo janggi tangtokengaha ine Marak aganaha.
“Uamangoni bang·batan CM Elevate program-chi janggi tangani cholrangko man·tokengaha aro mitamrangde homestay, gari ba tangka paisani gita dakchakanirangko man·e bading chiwale cha·tokenga. Uamangoni mitamrangde contractor-rangba ka·enga aro anga an·tangba uamangna kamrangko on·na jotton ka·enga. Ia manderangna officer-rangba an·tangtangni gadango dakchakanirangko on·na jotton ka·enga. Uamangoni darangba suk ong·jae buringrangona re·angpilna sikgiparang dongja aro uamang pilakan an·tangtangni janggi tanganiko namdapatnasa jotton ka·enga,” ine Marak aganaha.
“Da·o dipet bobil dolrangko bikottaina jotton ka·enga ine maming kobor dongkuja aro ia pilakan tol·e jangbingbanganirangsan ong·aia. GNLA aro ANVC dolrangni somoio rama jal·langrang namsrangjachim aro ua somoirango Simsang chibimako batsotaniara namen neng·begipa kam ong·ani gimin uan bobil dolrangna namgipa chol ong·skaachim. Indibga da·alo songantionan rama jal·langrang dongahani gimin bobil dake chakatgipa dolrangko bikottainade chol dongjaha,” ine Marak aganaha.