SHILLONG: Constitution (125th Amendment) Bill-ko ma·mong sorkari ra·chake, Indian Constitution-ni Sixth Schedule-ko taridapna miksonganirang chu·sokahaode, district council-rang ma·mong sorkarioniko direct funding ba tangka paisarangko joljol man·soe, Meghalaya a·dokni songadam nokadamrangna namgni ong·gnok ine Meghalaya a·dokni Rajya Sabha MP aro National People’s Party (NPP)-ni dilgipa Wanwei Roy Kharlukhi parakataha.
Ia Constitution (125th Amendment) Bill-ko da·o ong·enggipa Parliament-ni budget session-ona ra·angnaba gnang ine ka·dongsona man·engachim.
Ia Bill-na chakpaaniko parakatengon, “Sixth Schedule-ko taridapanirang chu·sokahaode, district council-rang ma·mong sorkarioniko direct funding-ko man·e songadam nokadamrang namgnirangko man·gnok,” ine Kharlukhi aganaha.
Election-na campaign ka·engmiting somoirangode manderang, a·gilsak salgisakkoba ku·mikchetna man·aia ine janapatengon, ia somoio district council-rangko mangrakbatatanikosa a·dokna nangenga ine Rajya Sabha MP parakataha.
Article 371-ko ra·gatchina dabienggipani giminde mamingkoba aganna gita jechakangengon, Jammu & Kashmir a·dokkon Article 370-ni ning·o chel·chakgenchimoba ia a·dokna mai ong·aha uko gisik ra·china Kharlukhi, a·dokni manderangko didiataha.
Sixth Schedule-ni Para 12A-ko kimitna nangengani gimin a·dok sorkari ku·pattianiko on·manahachim ine janapatengon, iako ma·mong sorkarini songe on·gipa committee niengkua ine Rajya Sabha MP parakataha.
“ADC-rang an·tangtangni chanchianirangko on·ahaon, iako Cabinet-o chanchirimgen aro uni ja·man Parliament-ona ra·anggen,” ine Kharlukhi aganaha.