TURA: Wajadatagre, Kalchengpara Veterinary Office-o Veterinary assistant ong·e kamko ka·enggipa mande saksa, batanggimin bilsi gittamna kamtangko ka·jaenga ine Selsella-o donggipa dingtang dingtang dolrangni nangrime bikotgipa All Selsella NGOs’ Alliance (ASNA), Shillong-o donggipa Animal Husbandry & Veterinary Department-ni Director-na badi ka·doataha.
Selsella NGO-rangni parakatani gitade, ia Veterinary assistant, batanggimin bilsi gittamna an·tangni office-onan re·bachipjaenga ine Wajadatagre songni Nokma, uamangna u·iataha.
“Ia veterinary assistant, kamtangona re·bachipjaengani a·selan, jilla kaanirangko dake cha·enggipa songni manderang, an·tangtangni jilla kaanirangko sanna banna nangani somoirango neng·nikanirangko chagrongna nangtokenga aro ia office-o kam ka·gipa veterinary assistant dongjani a·selan songni nokni manderang neng·nikanirangko chagrongna nangtokenga,” ine ASNA-ni dilgiparang, AH & Vety department-ni Director-na badi ka·e sedoatgipa chittio parakataha.
Kamtango gisik nangjaengani gimin ia veterinary assistant-ni kosako rakgipa ja·kurangko de·china didiatengon, mikkangchi Kalchengpara songni manderang, an·tangtangni jila kaanirangko name nirok sandina man·na gita ia mandeni biapo gipin veterinary assistant-ko songskachina Selsella-ni NGO-rang, AH & Vety-ni Director-ko mol·molataha.