SHILLONG: Election changantian manderang gital dilgiparangni kamko nina skani dongani a·selsa ia chang MDC election-o United Democratic Party (UDP) chu·sokgipa ong·jaha ine Mongolbar salo, UDP-ni dilgipa aro a·dokni Cabinet Minister Paul Lyngdoh a·kangataha.
Khasi Hills Autonomous District Council (KHADC) election-o UDP, dambonga seat-ko aro Jaintia Hills Autonomous District Council (JHADC) election-oba UDP damgittam seat-rangkosan cherikaiahachim ine nikna man·a.
“Election changantian manderang, gital dilgipako seoke nina skanirang dongrongani a·selsa ia district council election-o UDP name dakna man·jaha. Na·simang pilakan ma·sia da·ona kingkingan Voice of the People’s Party (VPP)-de changsaba bilo ong·kujani gimin chel·ao asonge bano mai ong·jaenga uko jaksi ote rona man·aia indiba chingade ru·uta somoirangonin bilo ong·ahani gimin manderang, nang·ni dakgualanirangko mesokna man·aia. Bil donggijagipa manderangnade, bilo ong·e nina skanirang dongaia,” ine Lyngdoh, kobor ra·timgipa manderangna aganaha.
KHADC aro JHADC damgnion chu·sokgipa ong·na man·ahani gimin VPP-na namgipa skaniko on·atengon, “Da·ode uamang KHADC-o Executive Committee-ko chalaina bil man·ahani gimin ian nambeaha. Anga uamangna an·tangni namgipa skaniko on·na kusi ong·a aro uamang an·tangtangni ku·rachakanirangko chu·sokatchina,” ine Lyngdoh aganaha.
Politics-ode tang·ona tang·doa dakade dongaia ine janapatengon, “Uamangni (VPP) campaign ka·anide chingni campaign ka·anioni namen dingtanga ine angade agangen indiba politics-ode na·a tang·doangenba ja·mano rang·san tang·onpilna man·aia aro ja·mano na·a tang·doangpilnaba man·aia. Ian politics ong·a,” ine UDP-ni working president aganaha.
District council election-ni result-rangko nipiltaina bakan UDP-ni dilgiparang apsan tom·rimgen ineba Lyngdoh parakataha.
“Oe ia chang chingni result-rang namen tang·onaha aro iako nipiltaina gita chinga bakan tom·aniko ong·atgen. Je biaprangon chinga name dakna man·jahachim, uarango chinga namdapatna jotton ka·gen,” ine ua aganaha.