TURA: Tura-ko Winter Capital songchina dabienggipani bidingo manderangna ma·siate on·na Mongolbar salo, A·chik Conscious Holistically Integrated Krima (ACHIK) dolni gita awareness campaign-ko South West Garo Hills a·jani Upper Damalgre bazar-o ong·atangaha.
Ia awareness program-ko ong·atanio ACHIK dolni working president Maclawrence M Sangma, jinmana aganprakangengon, Tura-ko Winter Capital songchina dabienggipani bidingo agan-talatanirangko on·angenba, Tura-ko Winter Capital songgenchimode, Garo Hills-oba pilakni gita namroro silroroaniko nikna man·genchim ine parakataha.
“Meghalaya a·dokko man·chengaonin Garo Hills-ko pilakni gitan galchipani a·sel tang·dona aro namroro silroroanirangko nikna man·jahani giminsa da·alo Tura-ko Winter Capital songchina dabienga aro ia dabiani chu·sokgenchimode Garo Hills-oba dingtanganiko nikna man·gnok aro manderangnaba pilakni gitan altubatgnok,” ine ACHIK-ni dilgiparang aganaha.
Tura-ko Winter Capital songna dabianiara gital dabiani ong·ja indiba iako chengon Meghalaya a·dokko man·dile on·anggipa pagitchamrang songgigrikahachim ineba ACHIK-ni working president talataniko on·angaha.
Ia awareness campaign-ko ong·atanio dongpae bak ra·anggipa gipin dilgiparangara, ACHIK Krima Council-ni general secretary Happynews R Marak, ACHIK North West Garo Hills Zone-ni general secretary Kronos Marak, Tura ACHIK-ni general secretary Adrian Sangma aro gipinrang ong·a.
