TURA: Meghalaya a·dokni Gram Daks Sevaks (GDS)-na kam ka·giparangko seokanio, Assamese aro Bengali ku·sikrangkoba bak ong·atchina didie, Rajabala constituency-ni MLA Dr Mizanur Rahman Kazi, Communication-ni Union Minister Jyotiraditya M Scindia-na sedoataha.
Union Minister-na sedoatgipa chittio Rajabala MLA-ni parakatani gitade, da·o dipet Meghalaya a·doko GDS-ni kamrangna manderangko seokanio Assamese aro Bengali ku·sikrangkode bak ong·atkujaengani a·sel, Assamese aro Bengali ku·sikko jakkalenggipa a·dokni manderangde GDS-ni kamrango seokako man·pajaengachim.
“Meghalaya a·dokoba Assamese aro Bengali ku·sikrangko jakkalgipa Non-Tribal-rang bang·en donga aro ia ku·sik minggnikon a·dokni dingtang dingtang biaprango, mongsongbate Garo Hills-o jakkaltoka. Uni gimin a·doko songdongenggipa pilak jatrangan apsan cholko man·pachina gita GDS recruitment-o Assamese aro Bengali ku·sikrangkoba bak ong·atchina anga nang·ko mol·molenga,” ine Kazi, Union Minister-na sedoatgipa chittio parakataha.
GDS recruitment-na online registration March 3 tarikon ong·engahani gimin ia bon·kamgipa tarikna skangan ja·kurangko de·china gitaba Rajabala MLA, Union Minister-ko didiataha.
Adita salrangna skangsan iani bidingo All Meghalaya Minorities Students Union (AMMSU)-ba Postal Service for India Post-ni Director General-na sedoatahachim ine nikna man·a.
GDS recruitment-o Assamese aro Bengali subject-rangko Indian Language dake ra·kujaenga ine AMMSU parakatenba, ia kamna dorgasto galenggipa pilak jatrangan cholrangko man·pachina gita ia subject-rangkoba Indian Language dake ra·china, Postal Service for India Post-ni Director General-ko didiatahachim.
Meghalaya Board of School Education (MBOSE)-ni Secondary School Leaving Certificate (SSLC) porikkao, a·dokni Koch, Rabha, Hajong, Muslim, Boro, Hindu aro uandakgipa jatrang Assamese subject-ko ra·toka ine janapatengon, ia jatni candidate-rangba GDS recruitment-na dorgastorangko galpana man·na gita form-rangko on·ani bon·kamgipa tarikna skangan, Assamese aro Bengali subject-rangkoba Indian Language dake ra·gatchina AMMSU, Postal Service for India Post-ni Director General-ko didiataha.