SHILLONG: Meghalaya-ni Governor CH Vijayashankar, nambata sannaniko ra·na AIIMS New Delhi-ona re·angna chanchienga.
Governor, janggil aro ja·sku saani gimin chadengna amjae wheelchair-ko jakkalna nangenga.
Kobor man·soani gita Governor, nambata sannaniko ra·na haida AIIMS-ona re·angnaba donga indiba da·o dipetde janggil aro ja·sku saana agre gipin neng·nikarang dongja.
State Assembly-ni budget session-ni skanggipa salo Governor be·en an·sengjani gimin wheelchair-o asonge re·baesa Meghalaya Assembly-o aganprakaha.
Speaker Thomas A Sangma, Chief Minister Conrad K Sangma aro Opposition dilgipa Mukul M Sangma- uamang Assembly-ni a·palo Governor-ko rimchaksoaha. Governor-ko House-ni ning·onan wheelchair-o rimangaha.
Indake ua minit 15 somoinasan kan·dike speech-ko on·aha ba aganprakaha. Uni ja·man Assembly-o legislator-rang baksa jachipchang ra·aha.
Be·en an·sengjani gimin Governor re·na-dona neng·nikako man·enga, adita saknaao ong·genchimoba ua House-ona dikdiksa somoinaba bak ra·aha.
