TURA: Adita salrangna skang, South West Garo Hills a·jaoniko cha·ue salangenggipa bolrangko, GSMC, GSU, AYWO aro APA dolrang, Kalaichar-o rim·rikna man·aha ine kobor on·aha.
NGO-rangni u·iatani gitade, ia bolrangko niam gri bol badingenggipa manderang, Walkamgre Khatuli songoniko ra·angengachim indiba iani bidingo koborko man·soenba, ia bolrangko Kalaichar-o rim·rikna man·aha.
“Ia manderang Transport Protocol (TP) grisa bolrangko salantian salangrongenga aro iako ma·sienba chinga ia bolrangko rim·aha. Ia manderangko GSMC Boldamgre unit-ni membor-rang sing·sandion, uamango bol ratani licence-rangba dongja aro uamang a·a nokgiparango sing·cheng sanchenggijasa bolrangko cha·ue ra·angengachim ine ma·sina man·aha,” ine dolbri NGO-rang parakataha.
Ia bol cha·ue salangenggipa manderangko rim·na gita NGO-rang, re·anggipa February 28 tarik attamni 6:00 bajimangonin sengaha aro pring 4:00 bajimangosa ia manderangko, uamangni cha·ue salangenggipa bolrang baksa rim·na man·aha ineba NGO-rang parakataha.
Garo Hills-ni bol wa·arangko iandake niam gri cha·ue salaniko champengna gita uamang mikkangchiba apsan daken nirok sandiangkugen ineba GSMC Boldamgre unit-ni environment secretary Chegrim Ch Marak parakataha.