TURA: Nangchongmotgipa lekka gri aro niamrangko pe·e koela salenggipa truck gariko re·na on·a ine matnangatenba, Rongjeng police station-ni officer-in-charge (OC)-ni kosako A·chik Concious Holistically Integrated Krima (ACHIK) Krima Council, West Garo Hills a·jani Deputy Inspector General (DIG) Western Range-na badi ka·doangaha.
ACHIK Krima Council-ni parakatani gitade, re·anggipa Bristibar attamni 7:30 bajimango uamang, Nongchram-o ong·atgipa tom·anio bakko ra·e re·bapilengmiting somoio, koela gape salangenggipa AS-18C 4777 truck gari bolsako Rongjeng Bazar-o nikenba ia gariko neng·takate sing·sandion, ia gari, maming nangchongmotgipa lekka grisa koelako salenga ine aganchakaha. Iani bidingo ACHIK dolni dilgiparang bakan Rongjeng police station-na kobor on·ataha indiba ua biapona sokbaon, Rongjeng police station-ni OC, ia gariko rim·ani pal, ACHIK dolni membor-rangkosa ka·mikkenatskaaha. Adita somoirangni ja·man dolsa manderangba ua biapona re·bae, ACHIK dolni membor-rangko ka·mikkenatna a·bachengaha aro indakmiting somoio Rongjeng police station-ni OC, niam gri koela salenggipa gariko re·angna wataha.
“Niamko rakkigipa police officer ong·e uni iandakgipa kamna chakpaaniko on·aniara, uni niam gri koela badinganio jak dongpaaniko mesokani ong·a. Uni gimin ia police officer-ni kosako inquiry-ko dakchina aro uni kosako rakgipa ja·kurangko de·china chinga mol·molenga,” ine DIG (Western Range)-na badi ka·e sedoatgipa FIR-o ACHIK Krima Council-ni general secretary Happynews Marak parakataha.
Iani bidingo ja·ku de·anirang dongjagenchimoba chubata gadangona re·ange badi ka·doangskagen ineba ACHIK Krima Council mikrakataniko on·angaha.