SHILLONG: Meghalaya State Investment Promotion & Facilitation (Amendment) Bill 2025-ko dingtang dingtang dolrang jegaltokengani gimin Meghalaya Assembly, ia Bill-ko Bristibar salo pass ka·anio ‘land bank’ ingipa kattako kimitna tik ka·angskaaha.
Ia MSIPF (Amendment) Bill-ko Budget Session-ni bon·kamgipa salo, a·dokni Chief Minister Conrad K Sangma, chanchirimaniona ra·baengon, ia Bill-ko pass ka·anio bang·en ma·sisretani aro jajaanirang dongengani gimin a·dok sorkari, Section 34-ko taridapaha aro manderangna ka·donganiko on·na man·na gita minggipin taridapanikoba ra·baaha ine parakataha.
A·dokni dingtang dingtang kamrango sorkari, maming niamrangko pe·gija manderangni nangnikanirangko knachakna re·baaha ine janapatengon, “Uni giminsa chinga ‘a·ako breachi ba gipin cholrangchi land-bank-rangko bikotani’ ingipa kattarangko den·galna Sec 4 clause 1-ni sub-section 3-ko kimitaha,” ine Chief Minister parakataha.
Meghalaya Investment Promotion Authority (MIPA) ‘land bank’-rangko bikotna aro private investor-rangna a·arangko on·na man·jana gita ia Bill-o ‘a·arangko breanichi land bank-rangko bikotani’ ingipa kattarangko sorkari kimitaha ineba Sangma aganaha.
MIPA-ni kamrango a·a breani ba a·a chimongani ba a·arangko transfer ka·anio maming dakeba jak on·na on·jawa ine janapatengon, iani kamara dongimin niamrango pangchake, a·dokna invest ka·anisan ong·aigen ine Chief Minister parakataha.
“Iani bidingo chanchirimna bang·en cholrang dongkuenga aro chinga dingtang niamrangko tariahaon pilak dolrangkon apsan chanchirimna gita okamgen,” ine Sangma aganaha.
MIPA, saniba a·ako brena aro sanaba transfer ka·e on·nade re·bajaenga ine janapatengon, manderangni jajrengenga gita ian badiaba company-rangna a·arangko transfer ka·na ba bree on·na gita bilrang dongja ine Chief Minister aganaha.
Iana skang, VPP-ni MLA Ardent Miller Basaiawmoit, MSIPF Amendment Bill-ni Clause 43 (1)-ni bidingo sing·doangenba, ia kattarangara Meghalaya Land Transfer Act 1971-oni dingtangani gimin ia Bill-o ia kattarangko kimitna nangenga ine aganaha.
Ia chanchirimanio Opposition dolni dilgipa Mukul Sangma aro Assembly-ni gipin membor-rangba bak ra·angpaaha aro ia Bill-o ‘land bank’ ingipa kattako kimite taridapna tik ka·ahani gimin a·dok sorkariko mittelpilangtokaha.
Assembly-o pilak membor-rangni namnikpaaniko man·ahani gimin ja·mano ia taridapgimin Bill-ko pass ka·e donangaha.
 |
ReplyForward
|