WILLIAMNAGAR: East Garo Hills a·jani Williamnagar jillao, be·en bitinrangko dongimin damrangna bate palengani gimin aro maming lekka gri be·en bitinrangko palengani gimin re·anggipa March 12 tariko, Simsanggre Butchers Association-ni tom·aniko Rongronggre Babare Park-o ong·atangenba, iarangni bidingo chanchirimangaha.
Ia tom·aniko Simsanggre Butchers Association-ni president Krish N Marak dilangaha aro ia tom·anio association-ni membor-rang jinma chanchirimengon, mitam be·en palgiparang, Williamnagar Municipal Board-ni dongimin damna bate palengani gimin iandake be·en bitin palaniko champengna aro mikkangchi Williamnagar jillao be·en bitin palgiparang pilakan Municipal Board-ni dongimin niamrangko ja·rikna nanggen ine tik ka·e donangaha.
Williamnagar Municipality-ni ning·o skatang wak, matchu aro uandakgipa be·enrangko palengani gimin aro be·en, na·tokrangko motorcycle-rango ra·rurae palengani gimin chanchirimangengon, nangchongmotgipa lekka gri aro Simanggre Butchers Association baksa bakrimgijade be·en aro na·tokrangko skatang palna sim·na man·jawa ine jinma tik ka·e donangaha.
Ia tom·anio, Simsanggre Butchers Association-ni accounts aro gipin report-rangkoba secretary-cum-accountant Roucking Manda Sangma-chi on·angaha aro bon·kamao association-ni vice president Jesber Marak-chi mittelpilani kattarangko aganenba, tom·aniko matchotataha.