SHILLONG: Meghalaya a·doko Forest aro Mining & Geology Department-rangni gisepo apsan bakrime kam ka·anirang dongjani a·sel gong kror 1.18 kajinarangko man·chipjaha ine Comptroller & Auditor General (CAG)-ni report-o parakaha.
CAG-ni report-o parakani gitade, 2018 bilsini April jaoni 2023 bilsini March jaona Divisional Forest Officer (DFO) Social Forestry & Territorial Division, Nongstoin-ni 2023 bilsio May-June jani audit test ka·aniko nipilon, 2023 bilsini March jaona kingking ming 16 mining lease-rangko on·aha ine nikna man·aha indiba ia ming 16 mining lease-oni sakgittam manderangonikode gong kror 1.18 kajinarangko giljaha ine ma·sina ma·sina man·aha.
Rong·chun salruraaniko DFO ma·sia ong·ode transport challan (Form H)-rangko lessee sakprakna on·na skangan uamangni kajinarangko gamchengchina aganna nangachim ineba CAG-ni report-o parakaha.
Indake ong·genchimoba DFO, kajinarangko gamchina gita lessee-rangna ge·etaniko on·jaha aro Mining department-naba kajinarangko gamchina ge·etna gita maming u·iatanirangko on·jaha. Iani bidingo department-na 2023 bilsini August jao aro uni ja·man sorkarina 2023 bilsini October jao u·iataha.
Lessee-rang kajinarangko gamama gamja uko ma·sina gita 2023 bilsini October jao DMR-ko Audit ka·aha aro 2019 bilsini January 4 tarikoni 2019 bilsini December 19 tarikona lessee-rangni kajina gamani bidingo maming see rakkianirang DMR-o dongja ine u·iatskaaha.
Uandaken Nongstoin Social Foresty & Territorial Division-ni DFO aro DMR-ni gisepo maming u·iatgrikanirang dongjahani a·sel gong kror 1.18 kajinarangkode man·chipjaha ine CAG-ni report-o parakaha.
Ia department ge·gnini gisepo ku·monge kamrangko ka·china aro u·iatgrike kam ka·china gitaba CAG, ku·pattianiko on·angaha.