RESUBELPARA: North Garo Hills a·jani Mendipathar-ona dingtang dingtang biaprangoniko matma ra·badamenba donenga ine Meghalaya Pradesh Youth Congress (MPYC)-ni president Timjim K Momin parakatenba, iani bidingo am·sandie nanga gita ja·kurangko de·china North Garo Hills a·jani Deputy Commissioner-na sedoataha.
“Matchu aro matmarangko West Bengal aro gipin a·dokrangoniko Garo Hills-ni dairy farm-ona ra·baenga ine news channel-rangoniko chinga nikna man·aha. Assam-oni bading chiwalgipa manderangsa ia matmarangko Bangladesh a·songona ra·angna gita Mendipathar-ko rama dake jakkalenga ineba chinga kobor man·soaha,” ine MPYC-ni president, North Garo Hills a·jani Deputy Commissioner-na sedoatgipa chittio parakataha.
“Ia matmarangko ra·bagipa manderang, jilla kaanirangna dongimin niamrangko ja·rikahama, iakoba chinga ma·sina sikenga. Ia matmarangko manderangni dongchakenggipa biaposa donengani gimin ian manderangna aro matmarangnaba sabisi sakanchirangko giproroatna man·a,” ineba Timjim parakatenba, ia matmarangko ra·bagipa manderang, songni Nokma-Sordar aro district council-oniko No Objection Certificate (NOC)-ko ra·ama ra·chengja ine sing·doataha.
Koborko on·ani gitade, batanggimin salrango ritchani ritcha matmarangko Mendipathar-ona ra·bae donengachim.
Iani bidingo ta·raken ja·kurangko de·china North Garo Hills a·jani Deputy Commissioner-ko didiatengon, niam pe·giparangni kosako rakgipa sastirangko on·china gitaba MPYC president dabiangaha.
“Ia matmarangko Khasi Hills-onasa ra·angenga ine uamang a·kangenga ong·ode, ia matmarangko uamang Mendipathar gita ra·bana man·jawa maina ian Guwahati-oni Khasi Hills-ona bate rama chel·bata. Iako name nichengna nangenga,” ine MPYC-ni president parakataha.
