Phulbari: Hatkhola-ni songo niamgri RCC dokanrang aro nok building-rangko rikanina jean GHADC-ni a·a ong·achim iani bdingo GHADC-ni Deputy CEM Nikman Marak-na Fight Against Corruption (FAC) matnangatani lekka on·aha.
Uamangni matnangatgipao, CSO matnangataha, a·ao niamgri ra·sekenga jekon Gomaijhora-ni ning·o donggipa songo antio changsa bazar cha·gipa ong·achim. Antio changsa bazaar anti cha·gipa ian songni manderangna tangka paisani gita man·gnigipa ong·achim jeon bazar antini salosa badingchiwalaniko dakna man·paachim.
“GHADC-oni maming ge·etani lekka ba ra·chakani gri uamang an·tangtangni bilko aro tangka paisani bilko mesoke RCC dokanrangko aro nok building-rangko antio changsa bazar anti cha·gipa dal·begipa a·damko niamgri tanggitik ra·sekenga ian uamang an·tangtangni man·gnirangna dakenga. Aro uamang nangchongmotgipa department-na maming revenue ba kajinarangko gamja,’ ine CSO uamangni matnanggipao seataha.
Uamang manderangni gamjinrangko jakkalsretgipa ong·e ia niamgri dokanrang aro nok building-rangna bilongen chanchina nangchongmotgipa ong·enga ine CSO agandapangaha.
“Iako da·on bon·atja ong·ode mikkangchi iana bate dingtang dingtang manderang uamangni man·gnirangna a·arangko ra·sekrikrikanggen. Manderangni dal·begipa namgnina a·ako GHADC chel·chakna nanga,” ine CSO aganaha.
Manderangni a·a gamjinrangko jemangan manderangni a·a gamjinrangko niamgri ra·sekenganina aro jakkalani kosako rakgipa ja·kuko de·china CSO da·o dabiangaha, Gomaijhora-ni wilwilao donggipa aro songo noko donggipa manderangni man·gnina antio changsa cha·gipa anti bazar-ara maia namgni ong·gen, ine CSO sing·angaha.
“Ia mamlao ning·tue am·sandianiko chinga nangnika aro niamgri rika cho·anirangko dakenggiparangko ra·galchina ge·etaniko on·akoba nangnika jean joltangni manderangna neng·nikaniko on·engachim,” ine uamangni matnangatanichi FAC-ni mande aganangaha.
GHADC-ni a·ao niamgri RCC dokanrang aro building-rangko rikanina FAC matnanga
Date:
Share post:
