SWGH a·jao Watershed Yatra-ko a·bachengata

AMPATI: PMKSY WDC 2.0-ni ning·o Watershed Yatra-ko Sombar salo, Rangsakona-ni MLA Subir M Marak, South West Garo Hills a·jani Rerapara C&RD Block ning·o donggipa Rangsakona kal·chakramo a·bachengate on·angaha.
Ia Watershed Yatra-ko a·bachengatna tom·aniko ong·atanio, South West Garo Hills a·jani Additional Deputy Commissioner Dolrich BG Momin, Soil & Water Conservation Department-ni gitcham Director Dr KC Momin, dingtang dingtang official-rang, songni Nokma-Sordarrang, chatro chatrirang aro gipinrangba dongpae bak ra·angtokaha.
Ia tom·anio Rangsakona-ni MLA Subir Marak, tom·anio bak ra·giparangna aganprakangengon, samtangtango ong·telaigiparangko aro chiring chibisikrangko tange rakkina nangengani gimin aganangaha.
Rev Gilbert Marak-ni segipa ‘Garo Hills Damgipin A·gisi’ ki·tapni gimin gisik ra·atpilangengon, chengode Garo Hills-o chiring chibisikrangan aro buring bolgrimrangan gapachim indiba da·alo a·barangko so·e cha·kuengani a·sel chiring chibisikrang tipengaha aro agansogimin gitan buring bolgrimrang porongrong ong·engaha ine Marak parakataha. Chiring chibisikrangko aro samtangtango ong·telaigiparangko tange rakkiani bidingo manderangna mikrakataniko on·na gita iandakgipa program-rangara namen nangchongmotgipa ong·enga ineba ua aganaha.
Ia tom·anio SWGH a·jani ADC aro Deputy Commissioner in-charge Dolrich BG Momin-ba jinmana aganprakengon, Shillong-o an·tangni china dilaniko cha·tote nikbaani gimin janapangenba, mikkangchina chirangko ripinge rakkina nangenga ine aganangaha.
Ia program-na skang, dingtang dingtang songrango donggipa manderangni ku·cholsan rongtalatanikoba ong·atangaha aro ia program-ni bak gita Rangsakona songo donggipa chiring chibisikrangko rongtalataha.
Ia program-ko ong·atani bak gita Rangsakona Higher Secondary Deficit School-o dingtangmancha chatro chatrirangna painting competition ba rong nongsusaanikoba ong·atangaha aro chegiparangna boksisrangko suale on·angaha.
Ia Watershed Yatra-ko re·anggipa March 19 tariko a·dok sorkari, a·dokni skotong Shillong songjinmaoni a·bachengataha aro ia gari Sombar salo, South West Garo Hills a·jaona sokbae dingtang dingtang biaprangona re·chakatangaha.