SHILLONG: Meghalaya a·doko niam gri koelarangko bikota dongja aro niam gri bikotgiparangko rim·enga ine a·dok sorkari a·kangahaoba, a·dokni dambri a·jarangoniko aerial survey ba drone-rangchi sandirokanio, metric ton (MT) lak 1.92-na baten niam gri bikotgimin koelarang donga ine nikna man·aha.
Mongolbar salo, Justice (Retd) BP Katakey-ni kobor ra·timgiparangna parakatani gitade, aerial survey-ko square kilometer 730-40-o dakaha aro je biaprangkon sandirokahachim, ia biaprangara skango hisapgimin koelarangni bidingo u·iatanio pangchakesa dakaha.
Ia aerial survey-ni report-ko on·manaha ine janapatengon, Coal India Limited (CIL)-ni dongimin depot-rangona ra·angenggipa koelarangara, hisapgimin koelarang ong·ama ong·ja uko ma·sina gitasa ia aerial survey-ko dakaha ine Katakey parakataha.
Ia aerial survey-ko East Jaintia Hills, South West Khasi Hills, West Khasi Hills aro South Garo Hills a·jarango dakaha aro sandirokanio, hisapgimin koelarangna agreba MT lak 1.92-na bate koelarangko man·aha ineba Justice (Retd) Katakey parakataha.
Iani bidingo taldapanirangko on·china gita Meghalaya High Court-ni songe on·gipa committee, official-rangna ge·etaniko on·angaha.
CIL-ni dongimin depot-rangna agrede gipin biaprango man·gipa koelarangkode niam gri ine chana ine talataniko on·angengon, aerial survey-ko dakanio nikgipa MT lak 1.92-na agreba koelarang dongama dongja, uko sandichina gita ia a·ja dambrini DC, SP aro nangchakegipa department-rangna ge·etaniko on·manaha ine Justice Katakey parakataha.
Da·o ia report-ko Justice (Retd) Katakey committee nipilanggen aro nanga gita agandapanirangko on·enba High Court-na on·anggnok.
Justice Katakey-ni parakatani gitade, iani bidingo MMDR Act-o pangchake ja·kurangko de·na, FIR-ko ka·na aro am·sandie man·gipa koelarangko dakkie galna donna nanggen aro dakkie man·gipa tangka pilakkon a·dok sorkariona sokate, koela bikotenggipa manderangnade ia paisarangko pelsaba on·jawa.