TURA: Assam Legislative Assembly-ni Deputy Speaker aro saksakamkam A·chik MLA Numal Momin-ko Congress dolni MLA saksa, Assam Assembly-ni a·palo kragija dake chadrapaha ine matnanganirang ong·katani ja·man ia a·selko Garo Hills-oni A·chik Conscious Holistically Integrated Krima (ACHIK) Krima Council-ba raken jegalataha.
Iani bidingo, Assam a·dokni Chief Minister Himanta Biswa Sarma-na sedoatengon, Assam Legislative Assembly-ni saksa Deputy Speaker aro A·chik MLA-ko Congress MLA Nurul Huda-ni chadrapaniara, seoka man·gipa MLA-kosan chadrapa ong·jaha indiba a·songni dongimin niamko pe·ani gitaba ong·aha ine ACHIK Krima Council parakataha.
“Dr Numal Momin, saksa Assam a·doko songdongenggipa manderangni pal, mongsongbate Assam-o songdongenggipa A·chik jat aro dingtang dingtang Tribal-rangni pal ku·rangko on·enggipa mande ong·a aro uni kosako iandake chadrapaniko chinga raken jegalenga. Assembly-ni saksa dilgipako iandake chadrapaniara ra·chakna man·gijagipa ong·a aro iani bidingo Assam sorkari rakgipa ja·kurangko de·na nanga,” ine ACHIK Krima Council-ni dilgiparang, Assam-ni Chief Minister-na sedoatgipa chittio janapataha.
Iandakgipa a·sel ong·anio Dr Numal Momin-na uamang chakpaaniko on·enga ine janapatengon, ia a·selni bidingo sandirokanirangko dakchina aro nanga gita ja·kurangko de·china ACHIK Krima Council, Assam-ni Chief Minister-ko didiataha.
Mikkangchi iandakgipa a·selrang ong·taijana gita Assembly-ni pilak membor-rangnan chel·chakaniko on·chinaba ACHIK, Assam-ni Chief Minister-ko didiataha.