TURA: Garo Hills Autonomous District Council (GHADC)-o kam ka·enggiparang ja 40 ong·na sipile dormaharangko man·kujaengani a·sel nokdangtangtangko chalaianio neng·nikanirangko chagrongna nangtokengaha ine GHADC-ni Non-Gazetted Employees Association (NGEA) parakatenba, uamangni man·na nangkuenggipa dormaharangko ta·raken on·china Executive Committee-o dabiangaha.
NGEA-ni president Brithen Sangma-ni kobor ra·timgiparangna u·iatani gitade, GHADC-o kam ka·enggiparang, ja 40 ong·na sipile dormaharangko man·kujaengani gimin GHADC-ni Executive Committee-ko gronge agangrikahachim indiba district council-o tangka donggijako pa·sike, uamangni dormaharangko on·chipkujaenga.
Re·anggipa 2024 bilsini December jao uamangna jasamangmangni dormahakosan on·aiaha aro ia 2025 bilsinikode jasanikoba on·srangkujaenga ineba Sangma, suk ong·gijaniko parakataha.
Indake ong·engon, GHADC-o kam ka·enggiparangna da·o salsnini gisepon dormaharangko on·china gita NGEA-ni dilgiparang, March 25 tariko, GHADC-ni Executive Committee-na lekka sedoataha aro ia salsnini gisepo dormaharangko on·jagenchimode, April 2 tarik dipet indefinite office picketing ba ari gri office-o kam ka·na on·gija jingjengatanggen ine Sangma mikrakataniko on·ataha.
“Chingaba mandesan ong·e nokdangrangko chalaina dormaharangko somoi gita man·pana nanga indiba ja 40 ong·pile dormahako man·jaenga ong·ode chinga maikai chingni nokdangrangko chalaina man·gen? Batanggimin sal somoirango dilgiparangni ku·rachakanirangko man·e chinga chakchike sengaha indiba da·alonan chingni dormaharangko on·na gisik nangjaengani gimin chinga jingjengatana agre maming gipin cholrang dongjaengaha,” ine NGEA-ni president parakataha.