AMPATI: Mahatma Gandhi National Rural Employment Guarantee Act (MGNREGA)-ni ning·o South West Garo Hills a·jani Belbari songo gital Job Card-rangko sualataha. Songadam nokadamrango donggipa manderang, kamrangko ka·e cha·na cholrangchi man·china gita ia songni manderangna, MGNREGA-ni ning·o gital Job Card-rangko sualataha.
Ia Job Card-rangko songni Village Employment Council (VEC)-o president ong·e kamko ka·enggipa president Haiba Ram aro secretary Joyraj Koch-ni dilanichi sualataha.
Ia executive committee-o Kongkabuti Koch, Mandira Koch, Rohisto Koch, Bihuli Koch, Soranando Koch, Kishan Koch, aro Rekson Koch-ba donga aro ia executive committee-ko songni dilgipa Bobit Ram Koch ra·chakangaha.
Official-rangni u·iatani gitade, ia job card-rangko suale on·anichi songni manderang, Rural Employment scheme-ni ning·o kamrangko ka·e hajirarangko man·tokgnok. Iani bidingo songni manderangba mittelpilaniko paraktokaha.
EGH-ni song damsao PDS-ni bosturangko man·jaenga
U·IATTIMGIPAONI
WILLIAMNAGAR: East Garo Hills a·jani Cheran Alda songo Public Distribution System (PDS)-ni ning·o on·enggipa Antyodaya Anna Yojana (AAY) aro Priority Household (PHH)-ni cha·ani bosturangko man·jaenga ine A·chik Dedicated Integrated Leaders (ADIL) dol parakataha.
Iani bidingo ADIL dolni gita East Garo Hills a·jani Deputy Commissioner-na badi ka·e sedoataha.
ADIL dolni Deputy Commissioner-na badi ka·e sedoatgipa chittio parakatani gitade, ia songo AAY aro PHH ration card donggipa nokdangrang, re·anggipa February jaonin an·tangtangni man·na nangenggipa PDS-ni bosturangko man·tokkujaengani a·sel neng·nikanirangko chagrongna nangtokenga.
“National Food Security Act (NFSA) 2013-ni ning·o kangal cholgri ong·gipa nokdangrang, jemangan ration card-rang donga, uamangde PDS-ni ning·o on·enggipa cha·ani bosturangko jaantian man·na nangani ong·achim indiba Cheran Alda songni manderang, re·anggipa February jaonin an·tangtangni man·na nangenggipa bosturangko man·tokjaenga ine chingna u·iataha,” ine ADIL dolni president Francis C Marak parakatenba, ia songni manderangna ta·raken PDS-ni bosturangko sokate on·china East Garo Hills a·jani Deputy Commissioner-ko didiataha.