SHILLONG: Manderangni matnanganirangko man·ronggenchimoba Meghalaya Energy Corporation (MeECL)-ni rakbee kamrangko ka·anichi Aggregate Technical & Commercial (AT&C)-o noksan ong·aniko 17 percent-ona komiatna man·aha ine Robibar salo, a·dokni Power Minister AT Mondal parakataha.
Mondal-ni parakatani gitade, kamrangko nambatatanichi, tangka paisa jakkalaniko simsakbatanichi MeECL-ni AT&C-o noksan ong·aniko komiatasan ong·aigija, grorangkoba chotna man·aha, bijolirangko palna man·aha aro Power Ministry-ni energy efficiency award-koba changgni joljol man·aha.
“Angko man·chape MeECL-ko pangnan manderang matnangronga indiba MeECL-ni AT&C-o noksan ong·ani 35 percent ong·aoniko 17 percent-ona komiatna man·ahani gimin an·ching uamangni kamrangko mittelpilna kraa. Ia pilakan MePDCL-ni rakbee kamrangko ka·anichisa ong·aha aro skango chinga D category-osa ong·achim indiba da·o chinga C category-ona ra·doatako man·aha aro mikkang bilsiode B category-ona tang·dona gita ka·dongenga,” ine Mondal aganaha.
MeECL-ni chu·sokgipa ong·anirangko janapatengon, uamang Power Ministry-oniko changgni joljol energy efficiency award-ko man·aha ine Power Minister parakataha. “Ia award-rangko a·songni President aro Vice President-ni jakchisa on·aha aro ian rakbee kamrangko ka·anichisa ong·ahani gimin ian MeECL-ni rakbate kam ka·aniko mesokaniba ong·a,” ine ua aganaha.
Load shedding ka·ani bidingo janapatskaengon, adita bilsirangna skangsan a·doko bijoliko kimitna nangrongani a·sel manderang neng·nikanirangko charongna nangrongachim indiba da·o uamangni power portfolio management nambate kamrangko ka·anichi load shedding ka·aniko komiatna man·aha. Ia sal somoirango nangchongmota kamrangna bijoliko kimitana agrede load shedding-ko ka·ani dongjaha ine Power Minister parakataha.
MeECL-ni grorangko chotna man·ahani giminba ua MeECL-ko mittelpile aganangaha.
“Gitcham salrangoni grorang dongkuani gimin grorang kror 488 gapangpilahachim aro Atmanirbhar loan-ko ra·ani ja·man chinga kror 244-mangkode gamna man·aha. Ia bangki kror 244 grorangba ja·mano kror 664-ona gadoangtaiaha indiba Chief Minister, Union Power Minister aro NTPC baksa agangrike chinga kror 99-mangkode komiatna man·aha aro da·o gong kror 565-mangni gita dongkuenga,” ine Mondal aganaha.
Grorangko chotpilani bidingo talataniko on·angskaengon, “Chinga uamang baksa agangrikaha aro uamang ia grorangko chang 20 dake gamchina aganengoba chinga japrako kror 15.7 ka·e chang 37 intstalment-o gamenga. 2026-27 bilsiode ia grorangko matchote gamna man·gnok,” ine Mondal aganaha.