SHILLONG: Matchotatna bangki dongenggipa Jal Jeevan Mission scheme-ni kamrangko matchotate on·na gita A·dok sorkari changni chang ku·rachakaniko dakgenchimoba ia project-ko matchotatna gita namen chel·engkua.
A·dok Sorkarini meja-mnio ku·rachakani gitade 2025-ni December jaon matchoatatani ong·achim, indiba da·o April ong·pilengjok indiba salsabatbat JJM project-rangko galchipani aro namgija dake on·ani koborrangsa nabaroroenga.
Da·alona kingking JJM-ni Dashboard-o mesokani gitade, ia scheme-o A·dokni ge 6,50,914 nokdangrangna chi sale on·na gita nisan kagiminonikon, ia mission-ko a·bachengataoni 5,29,885 (81.98 percent) nokdangrangna chirangko sale on·aha.
Ia Dashboard-o mesokani gitade, gimik dam 6456 songrangoni dam 4,123 songrangode 100 % nokdangrangnan chirangko sale on·aha aro da·o dam 2,322 songrangna kamrangko ka·enga.
Indake report-o janapani gitade South Garo Hills, 90.82 nokdangrangna pipe-rangko sale on·engaha.
Ia project-ko ka·e on·ani, a·dokni pilak district-rangna bate da·o dipetode East Jaintia Hills-on ja·manchakbatenga, jeon 66.70 mangni gitasan nokdangrangna chirangko sale on·kuenga ineba JJM-ni Dashboard-o janapaha.
