SHILLONG: Meghalaya a·doko bijoli jakkale gro donggipa manderang, an·tangtangni grorangko chotna man·na gita Meghalaya Power Distribution Corporation Limited (MePDCL)-ni One-Time Settlement (OTS) scheme 2025-ko jasana ra·dodapataha.
MePDCL-ni a·bachengo dongimin niam gitade, ia scheme, March 31 tarikon bon·ani ong·ahachim indiba da·o ia scheme-ko jasana ra·dodapatahani gimin, MePDCL-na gro donggiparang, re·baenggipa April 30 tarikonade ia scheme-ko ra·e, an·tangtangni grorangko chotna man·gnok.
Ia OTS scheme-ko a·dokni Chief Minister Conrad K Sangma, a·dokni Power Minister AT Mondal-ni dongpaanio, re·anggipa March 4 tariko a·bachengatahachim aro ia scheme-ko a·bachengatanichi bang·a manderangan, an·tangtangni bijoli jakkalani grorangko MePDCL-na chotna man·tokengahachim.
Ia OTS Scheme 2025-ara, 5 KW aro una komibatgipa bijoliko jakkale, gro gamchipjani gimin rattonggalako man·gipa ‘Domestic Low Tension (DLT) aro ‘Kutir Jyoti/BPL’ nokdangrangna ra·gate on·gipa scheme ong·a aro ia scheme-ko ru·uta somoirangoni gamchipgija dongenggipa grorangko man·pilna sorkari a·bachengatahachim.
Ia scheme-ko ra·gatanichi da·o dipet sak 12,262 bijoli jakkalgipa manderang bimingtangtangko segatahani gimin ia scheme-ni chu·sokgipa ong·aniko nikna man·enga. Indita sak manderang, ia scheme-ni namgnirangko ra·e an·tangtangni grorangko gamtokengahani gimin gimik gong kror 15.97 grorangko man·aha aro ianoni gong kror 11.13 principal amount-ko man·e gong kror 4.84-kode DPC waiver provision-ni ning·o wataha.
Da·o ia OTS scheme-ko April 30 tarikona ra·dodapatahani gimin bijoli jakkale gro dongkuenggipa pilak manderangkon ia cholko ra·e an·tangtangni grorangko chotechina MePDCL didiataha.
Iani bidingo bijoli jakkalgipa manderang, sepangbatgipa MePDCL office-ona ba toll fee 1912 nombor-ona ka·e sing·sandiatchina gitaba MePDCL didiataha.