M’laya-ni dingtang dingtang dolrang CoMSO-ko tangatpiltaina tik ka·a

SHILLONG: Meghalaya a·dokni dingtang dingtang nangchongmotgipa kamrangko jako ra·e ku·rang on·na gita Sombar salo, a·dokni dolsni Civil Society Organisation (CSO)-rang, Shillong songjinmao tom·aniko ong·atangenba, Confederation of Meghalaya Social Organisations (CoMSO)-ko bikotpiltaina tik ka·e donangaha.
Ia CoMSO-ko Hynniewtrep Youth Council (HYC) dilanggen aro iano, A·chik Progressive Approach (APA), Garoland State Movement Committee (GSMC), United A·chik Social Economic Justice Forum (UASEJF), Jaintia Students Movement (JSM), Confederation of Ri-Bhoi People (CORP) aro Jaintia National Council (JNC) dolrangba bak ong·gen.
NEHU-ni ICSSR-NERC Guest House-o tom·aniko ong·atangani ja·man kobor ra·timgipa manderangna talate on·angengon, a·dokni dingtang dingtang biaprango nangchakeaniko man·enggipa kamrangni bidingo apsan ja·kurangko de·na miksonge, ia nangrime bikotgipa CoMSO-ko tangatpiltaina tik ka·aha ine HYC-ni president Roy Kupar Synrem parakataha.
Da·alo uamang skanggipa tom·aniko ong·ate CoMSO-ko bikotpiltaina tik ka·angaha ine janapatengon, gnigipa tom·anio uamang CoMSO-ni office bearer-rangko seokanggen aro ia tom·aniko bakan Tura-o ong·atskagen ine Synrem parakataha.
HYC president-ni parakatani gitade, uamangni jako ra·e ka·na miksongenggipa kamrangoni mitamrangara, a·dokona niam gri napsrukanirangko champengani, Sixth Schedule-ko taridapna miksongenggipani, aro Constitution (Schedule Tribes) Order of 1950-ko taridapna nangengani gimin a·dok sorkariko didianian ong·gen.