SHILLONG: Meghalaya a·doko niam gri napsrukanirangko champengna Inner Line Permit (ILP) gita dakgipa niamrangko ra·gatchenggijade rel garirangko ra·bana man·jawa ine Khasi aro Jaintia Hills a·jani dingtang dingtang dolrang jegaltokengoba, rel garirangko ra·baani bidingo a·dok sorkari, jegalenggipa dolrangko man·chape dingtang dingtang dolrang aro a·doko songdongenggipa manderang baksa chanchirimkuna tik ka·angskaaha.
“Adita salrangna skang Cabinet tom·anio, mitam membor-rang rel garirangko ra·baani bidingo nambate chanchirimkuna aro ia chanchirimaniko dontongkujana tik chanchiangaha,” ine a·dokni Cabinet Minister aro MDA-ni ku·wattimgipa Paul Lyngdoh aganaha.
Rel garirangko ra·baani bidingo pilak a·jarangon dingtang dingtang dake chanchianirang donga ine janapatengon, “Iani bidingo pilak dolrang baksan chanchirimna Chief Minister ku·rachakaniko on·aha aro ia dolrangara, jegalenggipa dolrang, rel garirangko nangnikenggiparang aro da·o dipet maming ku·rang on·kugijagipa dolrangkoba man·chapenga,” ine Lyngdoh aganaha.
A·dokni namroro silroroanina chanchiengon, a·doko songdongenggipa manderangni nangnikanirangkoba niskana nanggen ineba ua aganaha.
“Ia ja·ku de·aniara namja ong·ja maina an·ching jera ra·grikani aro dingtang dingtang dolrang baksa ning·tubate chanchirimanichisa namgipa biterangkode man·na ama,” ine Lyngdoh aganaha.
Salgro salaramni pilak skotong songjinmarangkon rel ramarangchi nangdimatchina gita ma·mong sorkari didiengachim indiba Meghalaya a·dokode dingtang dingtang dolrangni jegalenganichi ian chu·sokgipa ong·na man·chipkujaengachim.
Byrnihat-oni Shillong-ona rel rama taribaaniko a·doko ra·chakjaengani gimin aro dingtang dingtang dolrang jegaltokengani gimin ia project-na chamatgipa gong kror 270 tangkarangko ma·mong sorkari bi·atpilengaha ine adita salrangna skangsan a·dokni Chief Minister Conrad K Sangma parakatahachim.
Ia project-na chamatgipa tangkarangko on·atpilchina ma·mong sorkarini seatgipa chittiko a·dok sorkari man·soaha ineba Sangma parakataha.
“Tangkarangko ma·mong sorkarioni bi·atpilengahani gimin ia project-ko chipna nangaignok aro Shillong-ona rel garirangko ra·bana man·jawaha,” ine Chief Minister aganaha.
Dingtang dingtang dolrang jegaltokengani gimin Byrnihat-Shillong rel project, 2016-2017 bilsirangonin bon·chipengahachim ine nikna man·a.