TURA: PMAY scheme-na tangkarangko gilenga ine West Garo Hills a·jani Deputy Commissioner aro Demdema C&RD Block-ni BDO-na badi ka·doangani ja·man, ia block-ni ning·o donggipa Bhangarpar songni dilgipa aro gipin sakgni manderangko dolsa manderang, kragija dake chadrapaha ine kobor on·aha.
Koborko on·ani gitade, PMAY scheme-na tangkarangko gile ra·enga ine badi ka·doangani ja·man sakgni manderang, songni dilgipa Motiur Islam baksana gipin sakgni manderangko kragija dake chadrapaha.
Ia a·selni bidingo Robibar salo, Bogulurbhita Outpost-o FIR ka·aha aro ia songni dilgipa baksana gipin sakgni manderangko kragija dake dokanio jak donggipa manderangara, Enamul Islam, Messer Ali, Gulam Hussain, Mojibor Rehman, Tofishuddin Ahmed, Alom aro Samsul Hoque minggipa manderang ong·achim ine ma·sina man·aha.
Songni dilgipa Motiur Islam-ni FIR-o janapani gitade, ia a·sel ong·ani Robibar salni 12:00 bajimango, Bhangarpar songo ong·aha aro ua somoio an·tangko media-ni mande ine a·kanggipa mande saksa, niam gri tangka gilenga ine matnanggipani bidingo uko sing·na okamatmika dakaha.
“An·tangko kobor ra·timgipa ine agangipa mande angko okamatahani gimin anga uko Patharkata Govt LP School sambao grongeaha aro uko sawa watataha ine sing·aha. Ia obostani bidingo matnangako man·gipa mande saksni uko songona rimbaaha aro badi ka·anirangko am·sandina gita uko C&RD office-oni watataha ine ua chingna aganaha. Angni unbaksa agangrikengmiting somoio, gam·bee jegrikako chinga knaaha aro ja·mano songni Saminul Islam aro Noor Islam-ko mande saksnini dokako chinga nikeaha,” ine songni dilgipa Motiur Islam, FIR-o parakaha.
“Ia manderangko dokmitingo anga champengna jotton ka·on, uamang angkoba dokaha maina angasa niam gri tangka gilgipani bidingo official-rangna badi ka·gipa ong·achim. Uamang angko gol·dikrangchi dokaha aro anga angni skoo aro ja·arango saknaanirangko man·e re·na man·jaha. Ia manderang mikkangchi angko namjabate chadrapna gitaba ka·mikkenataniko on·angahani gimin anga kenchipchipe dongna nangenga,” ine Islam parakataha.
Ia a·selni bidingo FIR baksana video-rangkoba police-rangna on·eaha.
Koborko on·ani gitade, ia a·sel ong·engmiting somoio, an·tangko kobor ra·timgipa ine a·kanggipa mandede ua biaponi katskaahachim.
 |
ReplyForward
|