TURA: West Garo Hills a·jani ning·o deficit aro adhoc skigiparangko man·chape, sorkarini kamko ka·enggipa je manderangan, NFSA 2013-ni PHH aro AAY (Ration) card-rangko jakkalengachim, uandakgipa manderangni jakkalenggipa card-rangko a·jao cholgri ong·batgipa manderangna on·skana man·na gita ration card-rangko on·pilchina, West Garo Hills a·jani Deputy Commissioner (Supply), nangchakegipa official-rangna ge·etaniko on·angaha.
DC (Supply)-ni parakatani gitade, NFSA 2013-ni ning·o PHH aro AYY card-rangkoa songsalo cholgri ong·gipa nokdangrangnasa miksonge ra·gatahachim aro ia card-rangko sorkario kam ka·e professional tax aro uandakgipa gipin kajinarangko gamenggipa nokdangrangde man·ani ong·jachim.
2011 bilsini Socio Economic Caste Census-o pangchakesa Ration card-rangko NFSA-ni namgnirangko man·enggipa manderangna sualaha ine janapatengon, 2011 bilsioni da·o bilsi 14 batangahani gimin bang·a manderangan da·o sorkarini kamrangko man·tokaha ine Deputy Commissioner (Supply) parakataha.
Ration card donge sorkario kam ka·enggipa pilak manderangkon April 30 tarikni gisepon, an·tangtangni ration card-rangko on·pilchina u·iatengon, ration card donge sorkario kam ka·enggipa manderangko sandienba an·tangtangni ration card-rangko on·pilna gita Deputy Commissioner (Supply)-ni office-o man·enggipa form-rango gapatkan u·iatchina, pilak songni Nokmarangko, Fair Price Shop dealer-rangko aro pilak Fair Price Shop-ni vigilance committee-rangna ge·etaniko on·ataha.