Cabinet-ni tom·anio adita niamrangko ra·chakanga

SHILLONG: Mongolbar salo, a·dokni Chief Minister Conrad K Sangma-ni dilanichi Cabinet-ni tom·aniko ong·atangaha aro ia tom·anio adita niamrangko Cabinet ra·chakangaha.
Ia tom·anio Retired Judges’ Secretarial Assistant & Domestic Help Rules 2013-ko taridapna proposal on·aniko Cabinet ra·chakangaha aro ia niamko taridapani bidingo kobor ra·timgiparangna talate on·angengon, kamoni neng·takgimin Judge-rangna bijoli, mobile connection aro petrol-ni korosrangko bariatchina kamoni neng·takgimin Judge-rang mol·molahani gimin ia niamko taridapna Cabinet ra·chakangaha ine a·dokni Chief Minister parakataha.
Chief Minister-ni parakatani gitade, kamoni neng·takgimin Judge-rangna japrako bijoli kajinako unit 1000-ona bariataniko gampilna, mobile connectivity-na japrako gong 4200 baksana kajinarang aro japrako petrol-ni korosko litre 100 ka·e gamna tik ka·aniko Cabinet ra·chakangaha.
Ia tom·anio Meghalaya State Language Act 2005-ko taridapna tik ka·anikoba Cabinet ra·chakangaha ine talataniko on·angengon, a·doko gital Eastern West Khasi Hills a·jakoba bikotahani gimin ia a·jao Khasi-ko associate official language dake ra·gatna aro ia niamo ia gital a·jaoba man·chapna gita ia Act-ko taridapna nangaha ine Chief Minister parakataha.
Ia tom·anio Meghalaya Witness Protection Scheme 2025-koba Cabinet ra·chakangaha aro Chief Minister-ni parakatani gitade, India a·songo minggittam Criminal Law-rang, chong·motan BNS, BNSS aro BSA-ko ra·gatahani gimin a·dok sorkarirang, Witness Protection Scheme-ko ra·gatna nangaha aro ia niamo pangchake, sakkirangko chel·chakna dingtangmancha niamrangkoba ra·gatna nangaha.
Indake ong·engon, ia Cabinet tom·anio, Housing Department-ni gital gadangni kamrangko man·chapna gita Principal Rule-ni Meghalaya Housing Engineering and Technical Service Rules, 2017-ko taridapanikoba Cabinet ra·chakangaha ine Chief Minister parakataha.
Una agreba, Lokayukta-ni Chairman aro Member-rangko songna gita bimingrangko sandianio Search Committee-na niamrangko taridapanikoba Cabinet ra·chakangaha aro Search Committee-ni membor-rangna sitting allowance-ko gong 2500-oni gong 5000-ona bariate, Chairman-na gong 3000-oni gong 6000-ona bariatna Cabinet tik ka·angaha ine Chief Minister parakataha.