RONGJENG: East Garo Hills a·jani ning·o ga·akgipa Mangsang Moronga A·king Nokmani a·arangko West Khasi Hills-ni Nonglang Sirdarship ra·sekna jotton ka·enga ine Mangsang jolo songdongenggipa manderang a·kangatani ja·man, iandakgipa kamrangko ta·raken dontongjagenchimode mikkangchi jatgnini gisepo dinggrikanirangona soknaba gnang ine Garo Students Union (GSU) mikrakataniko on·angaha.
Kosako janapgimin biapara Garo Hills aro Khasi Hills-ni simao donggipa biap ong·a aro ia biaprangara East Garo Hills a·jani ning·on ga·akgipa biap ong·e ian Garo Hills Autonomous District Council (GHADC)-ni ning·osa ga·akengachim ine kobor on·timgiparang u·iataha.
Iandake East Garo Hills a·jao ga·akgipa biapko Nonglang Sirdarship-ni sekdrana jotton ka·aniko GSU jegalatskaengon, Moronga Nengkram A·kingara GHADC-ni ning·o ga·akgipa biaprangsa ong·a aro Nengkram A·king (Mogru Nongkhongkhil)-ko Nonglang Sirdarship-ni ra·sekna jotton ka·aniara jolo songdongenggipa manderangna aro GSU-na ra·chakna man·gijani ong·a ine parakataha.
“East Garo Hills a·jani ning·o ga·akgipa Mogru Nongkhongkil-ko West Khasi Hills a·jani bak ine Nonglang Sirdarship-ni kangdraaniara ra·chakna man·gijani ong·a aro ian Moronga Nengkram A·kingo songdongenggipa manderangna dongtogijaniko on·enga,” ine GSU-ni president Tengsak Momin parakataha.
Ia songni manderangoniko Nonglang Sirdarship, gama ge·ani bostu mingantionikon kajinarangko gile ra·enga ine matnanganirangko man·soahani giminba GSU-ni president, suk ong·gijaniko parakataha.
“Chingni kobor man·soani gitade, ia jolo dal·a dal·jani kri nok rikgiparangba gong lak 5-mang ong·pile kajinarangko gamchina Nonglang Sirdarship ge·etaniko on·aha aro unbaksana ia biapo songdongenggipa manderangoniko dingtang dingtang kajinarangkoba gilenga. Ian namen kragijani aro ra·chakna man·gijani ong·a maina Mogru Nongkhongkil songara Moronga Nengkram a·kingni bakan ong·a ine GHADC-oba wa·reng salgiminan donga,” ine GSU president parakataha.
Ia songni mitam a·arangko Khasirang breahaoba, ia a·arangko West Khasi Hills a·jao napatnade man·jawa ineba Momin parakataha.
“Ia a·kingara GHADC-ni ning·o ga·akgipasa ong·ani gimin ia biaprangko West Khasi Hills-o napdraatna jotton ka·aniko dontongchina gita 2018 bilsini October 30 tarikon GHADC-ni Executive Membor I/c Land & Revenue BR Sangma-ni kachari, Sordarna ba Nenglang Sordarship-na ge·etaniko on·manaha. Ian GHADC-ni ning·o ga·akgipa biapsa ong·ani KHADC-oniba iani bidingo maming a·kanganirangko dakjaha,” ine GSU president parakataha.
GSU president-ni parakatani gitade, ia biaprangko West Khasi Hills-ni ine kangdraenba ia biaprango krongrangkoba songahachim aro songni manderang iako nike ra·galpilahachim indiba salgipinon Nongkhongkil-ko Nonglang Sirdarship-ni bak ine seaniko songe donskaaha.
Indake ong·engon, iani bidingo GSU, Garo Hills-ni gipin dolrang baksaba chanchirimaha aro uni ja·man GHADC-ni CEM, Deputy CEM aro Songsak-ni MDC-koba gronge ta·raken ja·kurangko de·china didiataha ine Momin parakataha.
“Nonglang Sirdarship-ni kamrangara Garo Hills-o songdongenggipa A·chik manderangni kosako sinjetani gitasa ong·enga aro iako chinga jrip nie dongjawa. Garo Hills-ni a·a inch-sakoba chinga Khasi Hills-na on·na man·jawa. Iani bidingo dal·a a·selrang ong·na skangan a·dokni Chief Minister, ja·kurangko de·na nanga,” ine GSU president didiataha.