SHILLONG: North Eastern Hill University (NEHU) Shillong Campus-ni Pro-Vice Chancellor ong·aniko kam wate, Acting Vice Chancellor-ni kamna dorgasto galskaani ja·man NEHU Teachers Association (NEHUTA) aro NEHU Non Teaching Staff Association (NEHUNSA) dolrangba, Prof Sherwin Sungoh-ko NEHU-ni Acting VC songchina nangnikaniko paraktokaha.
Prof Sungoh-ni NEHU Shillong Campus-o PVC ong·aniko watna tik ka·anikoba NEHUTA aro NEHUNSA namnike ra·chakangaha.
Sukrobar salo NEHUTA aro NEHUNSA dolrang, Vice Chancellor-ni office a·palo tom·enba, NEHU-o ong·enggipa obostangni gimin chanchirimangaha aro ia tom·anio NEHUTA-ni president Prof Lakhon Kma, jinmana aganprakengon, ia dolgnian Prof Sungoh-ni Acting VC ong·e kamrangko ka·anio, Education Ministry-ni ge·etanio pangchake chakpaanirangko on·anggen ine parakataha.
Da·o ong·enggipa kamko jako ra·anichi Prof Sungoh, regular appointment-rangkode dakna man·ja indiba ua Executive Council, Academic Council aro Finance Committee-ni tom·anirangko ong·atna aro temporary appointment-rangko dakan baksana Pro Vice Chancellor-ko nominate ka·na man·gen ineba Prof Kma aganaha.
Prof Kma-ni talatani gitade, Acting VC, University-ni Act-rangko taridapna bilko man·ja indiba regular VC-ni pilak kamrangkon ka·na man·a.
Sukrobar salo Prof Sungoh, dingtang dingtang kamrangna Tura-ona re·baahani gimin ua somoio Shillong campus-o dongjahachim.
Ua Shillong Campus-ni PVC ong·aoni sal 20-ni ja·man Budbar salo an·tangni kam watani chittiko on·angaha.
University-ni Statute 2(A)(5)(i)-o pangchake Prof Sungoh, Shillong campus-ni ja·delbatsranggipa professor ong·engani gimin da·o uan NEHU-ni Acting VC ong·na nangengachim.