TURA: Pangna bilsi manirongbaenga gitan mijal Robibar saloba, Jisu Kristoni rasong chae Jerusalem songjinmao napaniko gisik ra·na gita a·gilsak gimikon Kristian bebera·giparang ‘Palm Sunday’-ko maniangaha aro ia salko Garo Hills-oba pilak Kristian mondolirangon, kejur bijakrangko ra·e aro ring·mittele Isolko olakkiangtokaha.
Ia Palm Sunday-ko North Garo Hills a·jani Dainadubi Balmikram songoba Balmikram Baptist Mondolini gita maniangaha aro ia tom·bimonganio Balmikram Baptist Mondolini Pamong Bilchi Sangma, Sastro Johan 12:12-o pangchake, Isolni namgipa kattarangko aganangaha. Ia Palm Sunday-ko maniani bidingo agan-talate on·angengon, Jisu Kristoni chisolo datkapako man·e sina skang, uni rasong chae Jerusalem songjinmao napaniko gisik ra·na gita a·gilsak gimikon Kristianrang ia salko manironga ine Pamong Bilchi Sangma aganaha.
Garo Hills-ni gipin biaprangoba ia Palm Sunday-ko manderang kusi ong·e maniangtokaha aro pilak biaprangon bi·sarangni kejur bijakrangko ra·e, Isolna ring·mittelaniko nikna man·aha.