Garo Hills-o National Deworming Day-ko a·bachengata

AMPATI/TURA: Bi·sarangko okningo jo·ong gri ong·ate, an·seng baljokaniko on·na miksonganio National Deworming Day-ko mijal Mongolbar salni bako Garo Hills gimikon a·bachengataha aro ia National Deworming Day-ko Garo Hills-ni pilak biaprangon ong·ate, bilsi 1-oni bilsi 19 ong·kuenggipa bi·sarangna dingtang dingtang skulrango aro Anganwadi centre-rango okningo donggipa jo·ongrangko gimaatani samrangko on·anggen.
Ia Deworming ba okningo donggipa krimi jo·ongrangko siate, bi·sarangna an·seng baljokaniko on·na gita samrangko bilsio changgni dake on·enga aro mop-up round-ko re·baenggipa April 22 tariko ong·atengani gimin ia salo samrangko man·rikgijagipa bi·sarangba unsalo samrangko ra·skana man·gen.
Ia National Deworming Day-ko ong·atani bak gita Garo Hills-ni pilak skul aro Anganwadi centre-rangon, skigiparang aro Anganwadi worker-rang, okningo donggipa jo·ongrangko bon·atna gita ia samrangko ra·na nangani gimin agan-talatanirangko on·angaha.
South West Garo Hills a·jao ia National Deworming Day-ko Matalagre Govt LP School-o a·bachengataha aro ia program-ko Maternity & Child Health-ni Nodal Officer Dr Noreen Sangma dilangaha. Ia program-ko ong·atanio, District Program Manager Shirley Sangma, Mellim PHC-ni Senior Medical & Health Officer, health department-o kam ka·enggiparang, skigiparang, ASHA-rang aro Anganwadi worker-rangba bak ra·angtokaha.
Ia apsan salon, Zikzak C&RD Block-ni ning·o donggipa Paglapara II aro Adugre-o donggipa KGBV-oba ia program-ko ong·atangaha.
Apsan daken, West Garo Hills a·jaoba ia National Deworming Day-ko dingtang dingtang skulrango aro Anganwadi centre-rango ong·ate, bi·sarangna samrangko on·angaha.