EGH Tesokgittim songo JJM-ni kamrang namjaenga: GHYS

WILLIAMNAGAR: East Garo Hills a·jani Rongjeng Tesokgittim songo Jal Jeevan Mission (JJM)-ni kamrang tik ong·jaenganina aro ma·mong sorkarini dongimin niamrangko ja·rike kam ka·jaenganina Garo Hills Youth Solidarity (GHYS) Rongjeng Unit-ni President Chegasil N Marak, Contractor aro department-ni kosako jegalata. JJM ni kamko matchotaha ine Contractor-de Sign board-ko tapaha indiba 20 percent-ni gitade nokantiona chi siltongrangko salan dongkuja ine aganangenba iani gimin songni manderang departmentna badi ka·anirangko dakahachim indiba Authority-rangoniko maming aganchakaniko man·kuja. Unigimin kamtangko tik ong·e ka·gijagipa contractor-ni kosako ja·ku de·china dabiaha.
Contractor, JJM-ni kamko matchotani sign board-ko PHE department-ni rikgipa gitcham water tank mikango tape donaha indake kam matchotgijan matchotani sign board-ko contractor-ni tape donaniko songni manderang ma·sina ja·manchakja indiba iara contractor-ni songni manderangko cha·bokna jotton ka·ani ong·enga.
Unbaksana JJM-ni water tank rikgipaba chona nokantiona chi jokatna chu·ongjawa aro pipe siltongba chonmanchagipakosa tekenga ineba Chegasil Marak u·iatangaha. Je matchotgija donggkuenggipa nokdangrangna chi pipe-rangko sale on·piltaina nanggen aro chiko nokantiona jokate on·a nanggen. Ia JJM-ni kamko tik ong·e ka·angja ong·ode organisation, ia mamlako court-ona ra·angna aganaha.