TURA: Meghalaya Public Service Commission (MPSC)-ni gital chairperson-na Khasi-Jaintia jatonikon seoktaiaha ine A·chik Conscious Holistically Integrated Krima (ACHIK) Council parakatenba, iani bidingo nipiltaichina a·dokni Chief Minister Conrad K Sangma-ko didiataha.
ACHIK dolni Chief Minister-na sedoatgipa chittio parakatani gitade, da·o kamoni watangenggipa MPSC-ni chairperson-ba Khasi-Jaintia gadangonin ong·achim aro da·o gital chairperson-na seokako man·enggipa mandeba Khasi-Jaintia gadangonin ong·a.
“Meghalaya State Reservation Policy 1972-o Khasi-Jaintia aro Garorangko dolgni dake chanenba, dolpraknan 40 percent biapko kange donmanaha aro iano pangchaken MPSC-ni membor-rangko, mongsongbate chairperson-koba dolgnini gisepo sualgrike seokani ong·achim. Indake ong·genchimoba, MPSC-ko a·bachengaoni chairperson-ni kamko Khasi-Jaintia gadangoni changsku jako ra·aha aro Garorangonide changsnisan jako ra·kuengpiti. Ian Reservation Policy-o dongimin niamko pe·ani ong·a aro da·o changsataie MPSC-ni chairperson-na Khasi-Jaintia gadangoniko seokna ja·ku de·aniara ia dolgnini gisepo bak rengsi tikataniko meliatja gita ong·enga,” ine ACHIK Council parakataha.
Chairperson-ni kamko Khasi-Jaintia-Garo jatgittamni gisepo sualgrike on·na nanga ine mitam official-rangni agananiko jegalatskaengon, Reservation Policy-on Khasi aro Jaintia jatkode dolsan gita chanahani gimin iandake ja·ku de·anide kraani ong·ja baksana ra·chakna amgijani ong·gen ine ACHIK Council parakataha.
Reservation Policy-ko name ja·rikna gita 2022 bilsini April 5 tariko Meghalaya High Court-ba, roster system-ko ja·rikchina ge·etaniko on·manaha ineba ACHIK Council, gisik ra·atpiltaianiko on·angaha.
“Uni gimin MPSC-ni gital chairperson-kode Garo category-oniko seokskachina chinga raken dabienga aro iako ja·rikjagenchimode ian A·chikrangna on·gimin bak rengsiko ra·seka gita ong·enga,” ine Chief Minister-na sedoatgipa chittio ACHIK Council parakataha.