SHILLONG: A·dokona niam gri napsrukanirangko ta·rake champengjagenchimode bakan Meghalaya a·dokba Bangladesh pil·gnok ine Tura-ni Lok Sabha MP Saleng A Sangma, mikrakataniko on·angaha.
Batanggimin somoirangonin ua, a·song damgnini simarang gita Meghalaya a·dokona niam gri napsrukani bidingo Parliament-o changni chang janapengahachim ine gisik ra·ataniko on·angengon, Meghalaya a·dok ning·o ga·akgipa a·song damgnini simarangko bilakbate nirokchina ua Home Ministry aro BSF-naba baditaba chang chittiko sedoataha ine Sangma parakataha.
A·song damgnini simarango nirokenggipa sipai dolrangko bilakbatatna gita ua bakan sima nangchapgipa dingtang dingtang a·jani deputy commissioner-rang aro BSF official-rang baksa tom·aniko ong·atgen ineba Tura MP parakataha.
Sangma-ni aganani gitade, a·song damgnini simarango, Bangladesh a·songni dakait dakgipa manderang, niam gri napdrabaenba, manderangoniko ra·seke ra·engani gimin aro ong·gija kamrangko ka·rongengani gimin sima jolrango donggipa dingtang dingtang songni manderang kenchipchipesa janggi tangna nangtokenga.
Bangladesh a·song baksa nangchapgipa Meghalaya a·dokni km 443 simarango matchu, drugs, koela, ro·ong aro ma·manti bosturangko niam gri badingsrukanirangko nikna man·ronga ineba Tura MP parakataha.
Ia international border-ko chel·chakna gita ma·mong sorkari, maming ja·kurangko de·jagenchimode sima jolrango songdongenggipa Meghalaya a·dokni manderangko Bangladesh-ni manderang man·angtokgnok ineba ua mikrakataniko on·angaha.
Khasi Hills, Jaintia Hills aro Garo Hills-oba bang·a biaprangkon sima kakujaengani a·sel ia biaprang gita niam gri napsrukanirangko nikna man·enga ineba Sangma aganaha.
Border fencing kaanio je manderangan, an·tangtangni gama ge·ani aro a·arangko gimaatna nangengachim, uandakgipa manderangna sorkari, chu·onga gita tangka paisarangko gamskana nanga ineba Tura MP aganaha.
 |
ReplyForward
|