SHILLONG: Bang·bata biaprangon nalarang dongjani a·selan chirang sikkonge, ramarang nosto ka·ako man·rongengani gimin a·dokni pilak biaprangon rama jal·langrangko tarianio, nalarangkoba name tarina jotton ka·enga ine a·dokni Deputy Chief Minister aro PWD (Roads) Minister Prestone Tynsong a·kangataha.
Ramarangko name rakkianide department-ni daitosan ong·ja ineba ua aganskaaha.
“Jillarangosan ong·aigija songadam nokadamrangoba rama jal·langrangko tarianio chinga nalarangko tarijolna jotton ka·enga maina nalarang dongjani a·selan chirang sikkonge ramarang nosto ka·ako man·ronga,” ine ua aganaha.
Rama kosakrango chirang sikkonge dongani a·selan ramarang ta·raken nosto ong·pilronga aro ru·ute baikamna man·ja ine janapatengon, iani giminsa ramarangko taridapengon ba gital tariengon, nalarangkoba tarina sorkari gisik on·e kam ka·enga ine PWD (Roads) Minister parakataha.
Tynsong-ni aganani gitade, ramasamrango donggipa nalarangko manderang jakkalsretrongani a·selan PWD department, neng·nikanirangko man·rongenga.
“Noktangtangni jabolrangko mikka chirangan sepangbatgipa chiringrangona man·angaigen ine bang·a manderangan ma·sisretronga. Indiba ian kakket ong·ja maina jabolrangko nalarango galahaode, chirang jokna man·jae, ramarangosa chirang sikkongskaronga aro ian mongsongbate jillarango ong·rongbata,” ine Tynsong aganaha.
Jabolrangko skatang nalarango galjachina gitaba a·dokni Deputy Chief Minister, a·doko songdongenggipa pilak manderangkon didiataha.
Apsan daken chisamrango skatang jabolrangko galjachina gitaba Tynsong, manderangko didiataha.
“Chiringrango jabolrangko galanichi chini name jokaniko champengna man·a aro ian chi bananiko ong·atna man·a,” ine ua talataniko on·angaha.
Ramarangko name rakkianio sorkari baksa bakrimchina gitaba ua a·doko songdongenggipa pilak manderangkon didiataha.