M’laya Speaker, Chandigreo honey processing centre-ko opraka

TURA: West Garo Hills-ni ning·ogipa Nokrek a·bri ja·pao donggipa Chandigreo, Meghalaya Legislative Assembly-ni Speaker, Thomas A Sangma mejalo damsa gitalgipa Honey Processing Centre-ko oprake on·aha. Ia programko District Commerce aro Industries Centre (DCIC), Tura-ni gita ong·ataha.
Ia centre-ko nokdonggae on·ani somoio MCCL Vice-Chairman Dabo M Marak, Rongram C&RD Block-ni Block Development Officer Cherime R Sangma, dingtang dingtang department-rangni official-rang, Bee-Keeping Cooperative Society memborrangba bakko ra·aha. Uamang baksana, Nokrek jolo donggipa dam 16 songni manderangba bakko ra·aha.
Tom·anio jinmana aganprakengon, Garo Hills-o man·gipa bija bitchirangni nambatani ba su·ubatani gimin BDO mittele aganan baksa a·gilsako nambatgipa bija bitchirangoni Garo Hills-o man·gipaba ong·paa ine aganaha.
Indake ong·engon, cooperation society-ko apalbatatangchina gitaba ua a·jolo bija jile cha·giparangna didianiko on·aha, je dolon da·o sak 357 memborrang donga, uoniko komibeoba sak 1,000-ona sokatchina didiaha aro nisanona sokatgenchimode, gipin  processing unit-ko kulina dakchakgen ineba ua ku·rachakaha.
DCIC Tura-ni General Manager, Don Felecient R Marak agana je gital centre-ko ru·utgijan Nokrek Area Bee-Keeping Cooperative Society Limited, Chandigre-na pakwatgnok. Ia society-ko, dam 16 songni memborrangchi rikaha, ia centre-ko department-ni dilanichi chalaigen.
F. A. Sangma, Functional Manager aro Apiculture Mission-ni Nodal Officer agana, ia centre-na Apiculture Mission 2.0-ni ning·o Tg lak 15-ko honey processing unit-na aro Tg. lak 15-ko rika-cho·anina chamataha.