SHILLONG: Garo Hills-o donggipa war memorial ba Cenotaph sepango commercial structure-ko rikjawa ine a·dok sorkari u·iataha.
Cenotaph sepango commercial buildingko rikna kobor jangani gimin bang·arangan iako jegaltokenga, unbaksana stakeholder-rang baksa chanchirimgija sorkari, memorial-ko rikna chanchianikoba raken jegaltokaha.
Cabinet Minister Marcuise N Marak, jean Garo culture aro heritage-ko ripingna sak 28 memborni committe songgipako dilgipa ong·a, uan war memorial sepango commercial structure ba buildingko rikjawa, ua biapo war memorial-kosan rikpiltaigen ine talataha.
“Ia jani 30 tariko gnigipa tom·aniko ong·atgen, tom·aniona jolni architecture-rangko design tarichina okamaha, uoniko namnika dongode a·dok sorkarina on·gen.”
Committee-ni skanggipa tom·ani bidingo parakataon, Minister indine aganaha, “Pe·galgipa Cenotaph-ko rikpiltaiani bidingo chanchirimaha. Stakeholder-rang baksa agangrika dongja ine civil society group aro union-rang jegalenga.”
Project-ni bidingo adita so·sojengjeng ong·ani gimin sorkari, committee-ko songaha. Tom·anio stakeholder-rang bakrimenga, skanggipa tom·ani matchotjok.
“Gimik stakeholder-rangan Cenotaph-ko apsan biapon rikpiltaina aganaha. Cenotaph-o bang·arangni bimingrang dongja ineba aganaha. Uni gimin man·a ong·ode old circuit house, public school donggipa sepangjolo rikna chanchienga, jedakode museum-koba rikjolna man·gen.”
Minggipin watchanggipa bimingrangko man·a jotton ka·enga, jedakode uamangni bimingko segate rakkina man·gen.
“1st World War-o sak 1000 manderangko dakgrikna rimangaha, jeoni sak 500-ko rakkiaha, sak 400-ko France-ona watataha, sak 105 re·bapilaha, jeoni mitamrangde siaha. Bang·gija manderangni bimingrangsan dongaia, uni gimin committee, jemangni bimingko watchangaha, uamang gimikni bimingkon sandie napatna nangnikenga.”
