‘Tol·gipa’ CA-ko ra·galchina Tura MDC dabia

SHILLONG: ‘Tol·gipa’ Chartered Accountant (CA) Sumit Kumar Jain Bohra baksa Memorandum of Understanding (MoU)-o soi ka·grikaniko den·galpilchina gita Tura-ni MDC aro Bharatiya Janata Party (BJP)-ni state vice president Bernard N Marak, Garo Hills Autonomous District Council (GHADC)-o dabiangenba, antisani gisepo iako chu·sokatja ong·ode ia tol·gipa CA-ko GHADC-ni consultant dake songanio jak donggipa pilak manderangni kosakon ainni gita ja·kurangko de·anggen ine mikrakataniko on·angaha.
Iani bidingo GHADC-ni Secretary-na sedoatengon, “Ia tol·gipa CA baksa MoU-o soi ka·grikaniko antisani gisepon den·piljagenchimode, ia tol·gipa CA baksa MoU-o soi ka·anio jak donggipa sakantini kosakon ainni gita ja·kurangko de·na draatako man·gen,” ine Marak parakataha.
GHADC-ni consultant-na songako man·gipa Bohra, CA degree-ba dongja aro Tribal council-na kam ka·na gita nangtelgipa Trading for Non-Tribal (TNT) licence-ba dongja ine janapatengon, ia mande baksa MoU-o songgigrikaniko ta·raken den·galpilchina Marak dabiangaha.
GST-ni kamrangna GHADC-ni consultant dake rakkienba, gong kror 8-na baten una gamna ku·rachake gong kror 1.2-ko advance dake gamsoahani giminba Tura MDC, GHADC-ni dilgiparangko sing·doataha.
“Ia mandena gong kror 1.2 tangkarangko advance payment dake gamaniara niamni a·palo ong·a aro ra·chakna man·gijani ong·a,” ine Marak parakataha.
Bohra-ni degree aro nangchongmotgipa lekkarangko sandichenggija district council-ni kamna CA dake songahani gimin sing·doatengon, “Ia mandeko CA dake rakkina Executive Committee tik ka·jagenchimode maikai MoU-o soi ka·aha? Ia mande angni constituency ning·on dongenga indiba changsaba TNT recommendation-na ango dorgasto galarangba dongja,” ine Marak parakataha.
“Ia mandeo TNT dongjani gimin aro CA dake tol·gipasa ong·ani gimin Sumit Kumar Jain Bohra baksa MoU-o soi ka·aniko ta·raken den·galpilchina anga mol·molenga. TNT aro CA degree donggijagipa Non-Tribal manderangni jakkalsretaoniko GHADC-ko chel·chakchina anga mol·molenga,” ine Tura MDC parakataha.